ஊரடங்கை சாதகப்படுத்திய கொள்ளையர்கள்

-எம். றொசாந்த்

பொலிஸ் ஊடரங்குச் சட்டம் அமுலில் இருந்த வேளையில், வீடொன்றுக்குள் புகுந்த கொள்ளையர்கள், அங்கிருந்து பணம், நகைகளை கொள்ளையடித்துச் சென்ற சம்பவமொன்று, தென்மராட்சி – கோவிலாக்கண்டியில், திங்கட்கிழமை (22) நள்ளிரவு இடம்பெற்றுள்ளது.

நள்ளிரவு 12.30 மணியளவில், கோவிலாக்கண்டியில் உள்ள வீடொன்றை உடைத்து உட்புகுந்த 6 பேர் கொண்ட கொள்ளை கும்பல், வீட்டிலிருந்த மூவரையும் மிரட்டி, அவர்கள் அணிந்திருந்த நகைகள் மற்றும் அலுமாரியிலிருந்த நகை என மொத்தம் 28 பவுண் தங்க நகைகளையும் பணத்தையும் கொள்ளையடித்துத் தப்பிச் சென்றுள்ளனர்.

இதேவேளை, நவாலி - பிரசாத் லேனில் உள்ள வீடொன்றில், நேற்று  (23) 16 பவுண் நகைகள் திருடப்பட்டுள்ளதாக, மானிப்பாய் பொலிஸ் நிலையத்தில் முறைப்பாடு செய்யப்பட்டுள்ளது.

இவ்விரு சம்பவங்கள் தொடர்பிலும், இதுவரை எவரும் கைதுசெய்யப்படவில்லையென, பொலிஸார் இன்று (24) தெரிவித்தமை குறிப்பிடத்தக்கது.