ரூபாவின் பெறுமதிக்கு தொடர்ந்து அழுத்தம்

- பங்குச்சந்தை மற்றும் தங்கம், வெள்ளி விலை நிலைவரங்கள் 

 

-ச.சேகர்

 

வெளிநாட்டு முதலீட்டாளர்கள் தொடர்ந்து அதிகளவு பங்கு விற்பனையில் ஈடுபாட்டை காண்பித்து வருகின்றமையால், பங்கு கொடுக்கல் வாங்கல்கள் கடந்த வாரமும் சரிவான பெறுமதியை பதிவு செய்திருந்தது. கடந்த வெள்ளிக்கிழமை ஜோன் கீல்ஸ் ஹோல்டிங்ஸ் பங்குகளின் மீது அதிகளவு கேள்வி நிலவியதன் காரணமாக சந்தை கடந்த ஒருவார காலப்பகுதியில் பதிவான உயர்ந்த பெறுமதியை பதிவு செய்திருந்தது. ரூபாவின் பெறுமதி தொடர்ந்தும் அழுத்தத்தை எதிர்நோக்கிய வண்ணமுள்ளது. நாணயக் கொள்கையில் மத்திய வங்கியின் இறுக்கத்தை ஏற்படுத்தாவிடின், தொடர்ந்தும் இலங்கை ரூபாவின் பெறுமதி வீழ்ச்சியடையும் என நாணயமாற்று முகவர்கள் கருத்து தெரிவித்திருந்தனர்.  

 

கடந்த வெள்ளிக்கிழமை பங்குச் சந்தை நடவடிக்கைகள் நிறைவடையும் பொழுது, அனைத்து பங்கு விலைச் சுட்டெண் 6,041.06 ஆகவும், S&P ஸ்ரீலங்கா 20 சுட்டி 3409.16 ஆகவும் அமைந்திருந்தன. 

 

ஜூலை 15ஆம் திகதியுடன் ஆரம்பமான கடந்த வாரத்தின் இறுதியில் மொத்த பங்கு புரள்வு பெறுமதியாக ரூ. 2,754,756,167 அமைந்திருந்தது. கடந்தவாரம் மொத்தமாக 21,035 பங்கு கொடுக்கல் வாங்கல்கள் இடம்பெற்றன. இதில் உள்நாட்டு கொடுக்கல் வாங்கல்கள் 20,089 ஆகவும் வெளிநாட்டு கொடுக்கல் வாங்கல்கள் 946 ஆகவும் பதிவாகியிருந்தன.

 

கடந்தவார கொடுக்கல் வாங்கல் நடவடிக்கைகளில் சுவதேஷி, செரண்டிப் லாண்ட், நமுனுகுல, ஈக்குவிட்டி டூ பிஎல்சி மற்றும் யூனியன் கெமிக்கல்ஸ் போன்றன முதல் ஐந்து சிறந்த இலாபமீட்டிய பட்டியலிடப்பட்ட கம்பனிகளாக பதிவாகியிருந்தன. 

 

ஒஃபிஸ் இக்யுப்மன்ட், சிலோன் பிரின்டர்ஸ், குட் ஹோப், மெக்வூட்ஸ் எனர்ஜி மற்றும் பிசி பார்மா போன்ற நிறுவனங்களின் பங்குகள் அதிகளவு நஷ்டமீட்டியதாக பதிவாகியிருந்தன.

 

தங்கம் மற்றும் வெள்ளி விலை 

கடந்த வாரம் 24 கெரட் தங்கத்தின் சராசரி விலை 43,000 ரூபாவாகவும், 22 கெரட் தங்கத்தின் விலை 40,000 ரூபாவாகவும் அமைந்திருந்ததாக தங்க நகை வியாபார வட்டாரங்களிலிருந்து அறிந்து கொள்ள முடிந்தது. 

 

நாணய மாற்று விகிதம்

கடந்த வாரம் டொலருக்கு நிகரான ரூபாவின் சராசரி விற்பனை பெறுமதி 133.15 ஆக பதிவாகியிருந்தது. ஐக்கிய இராச்சிய பவுணுக்கு நிகரான சராசரி விற்பனை பெறுமதி 197.41 ஆக காணப்பட்டிருந்தது. தொடர்ந்தும் டொலருக்கு நிகராக ரூபாவின் பெறுமதி குறைவடைந்த நிலையிலேயே கடந்த வாரமும் காணப்பட்டது.