ஏற்றுமதியாளர்களின் டொலர் விற்பனைக்கமைய ரூபாவின் பெறுமதி சற்று உயர்வு

ஏற்றுமதியாளர்களின் டொலர் விற்பனை அதிகளவில் இடம்பெற்றதை தொடர்ந்து, இலங்கை ரூபாவின் பெறுமதி சற்று அதிகரிப்பை வெளிப்படுத்தியிருந்தமையை அவதானிக்க முடிந்தது. ஆயினும், இந்த பெறுமதி கடந்த பத்து மாதங்களில் மிகவும் குறைந்தளவு பெறுமதியாகவே நிறைவடைந்திருந்தது. 

 

வெள்ளிக்கிழமை 131.60-70 ஆக நிறைவடைந்திருந்த டொலருக்கு நிகரான ரூபாவின் பெறுமதி நேற்று திங்கட்கிழமை கொடுக்கல் வாங்கல்களின் போது 131.55-65 ஆக பதிவாகியிருந்தது. தொடர்ந்தும் குறுங்கால அடிப்படையில் டொலருக்கு நிகரான ரூபாவின் பெறுமதி வீழ்ச்சியடையக்கூடிய நிலை காணப்படுவதாகவும், எதிர்வரும் காலங்களில் இந்த பெறுமதி 131.50 – 132 ஆக அமைந்திருக்கும் என விற்பனையாளர்கள் அறிவித்திருந்தனர். 

 

இந்த நிலையை முன்னேற்றுவதற்கு இலங்கை மத்திய வங்கி நாணய மாற்றுக் கொள்கையில் தலையிட்டு கொள்கையில் இறுக்கமான நடைமுறைகளை முன்னெடுக்க வேண்டும் என்ற கருத்தை வெளியிட்டிருந்தனர்.