பங்குச்சந்தை மற்றும் தங்கம், வெள்ளி விலை நிலைவரங்கள்

-ச.சேகர்

 

கொழும்பு பங்குச்சந்தை கடந்த வாரம் பெருமளவு நேர் பெறுமதிகளை பதிவு செய்திருந்தது. குறிப்பிடத்தக்க அம்சங்களாக, டச்வுட் இன்வெஸ்மன்ட்ஸ் பணிப்பாளர் சபையிலிருந்து நாடாளுமன்ற உறுப்பினர் துமிந்த சில்வா இராஜினாமா செய்திருந்தமை அமைந்திருந்தது. 

 

கடந்த வெள்ளிக்கிழமை பங்குச் சந்தை நடவடிக்கைகள் நிறைவடையும் பொழுது, அனைத்து பங்கு விலைச் சுட்டெண் 5,837.95 ஆகவும், S&P ஸ்ரீலங்கா 20 சுட்டி 3231.79 ஆகவும் அமைந்திருந்தன.

 

செப்டெம்பர் 30ஆம் திகதியுடன் ஆரம்பமான கடந்த வாரத்தின் இறுதியில் மொத்த பங்கு புரள்வு பெறுமதியாக ரூ. 4,809,349,499 அமைந்திருந்தது. கடந்த வாரம் மொத்தமாக 43,963 பங்கு கொடுக்கல் வாங்கல்கள் இடம்பெற்றன. இதில் உள்நாட்டு கொடுக்கல் வாங்கல்கள் 42,598 ஆகவும் வெளிநாட்டு கொடுக்கல் வாங்கல்கள் 1,365 ஆகவும் பதிவாகியிருந்தன.

 

திங்கட்கிழமை

டிஸ்டிலரீஸ், ஸ்ரீலங்கா ரெலிகொம் மற்றும் DFCC வங்கி ஆகியவற்றின் விலைகள் சரிவடைந்ததன் காரணமாக பரந்த சந்தைப்பெறுமதியிலும் வீழ்ச்சி அவதானிக்கப்பட்டது. நேஷன்ஸ் ட்ரஸ்ட் வங்கியின் பங்குகளில் மொத்த அளவில் கைமாறப்பட்டிருந்ததுடன், மொத்தப்புரள்வு பெறுமதியில் அதிகளவு பங்களிப்பை வழங்கியிருந்தது. காலை 10.30 மணிக்கு டச்வுட் இன்வெஸ்ட்மன்ட் கொடுக்கல் வாங்கல்கள் மீள ஆரம்பமாகியதை தொடர்ந்து, சந்தை நடவடிக்கைகள் விறுவிறுப்பாக இடம்பெற்றிருந்தன.

 

செவ்வாய்க்கிழமை

சந்தை நடவடிக்கைகள் மறைப்பெறுமதியில் நிறைவடைந்திருந்த போதிலும், கொடுக்கல் வாங்கல்களின் எண்ணிக்கை உயர்ந்தளவில் காணப்பட்டது. மொத்தப்புரள்வு பெறுமதி 1 பில்லியன் ரூபாவை விட அதிகரித்து காணப்பட்டது. பிரதான சுட்டிகள் மறை பெறுமதியை பதிவு செய்வதில், நெஸ்லே லங்கா மற்றும் ஏசியன் ஹோட்டல்ஸ் அன்ட் புரொப்பர்டீஸ் பங்களிப்பை வழங்கியிருந்தன. சம்பத் வங்கி, ஜோன் கீல்ஸ் ஹோல்டிங்ஸ், செரன்டிப் ஹோட்டல்ஸ் மற்றும் நு-செனலிங் போன்றவற்றில் மொத்த வியாபாரம் இடம்பெற்றிருந்தது. டச்வுட் இன்வெஸ்ட்மன்ட்ஸ் மற்றும் அமானா டகாஃபுல் ஆகியவற்றின் மீது சிறியளவிலான முதலீட்டாளர்கள் ஆர்வம் செலுத்தியிருந்தனர். வெளிநாட்டு முதலீட்டாளர்கள் அதிகளவு கொள்வனவில் ஈடுபட்டிருந்தனர்.

 

புதன்கிழமை

காலை முதல் கொடுக்கல் வாங்கல் நடவடிக்கைகள் விறுவிறுப்பாக இடம்பெற்றிருந்ததை தொடர்ந்து, இரண்டு பிரதான சுட்டிகளும் நேர் பெறுமதியில் நிறைவடைந்திருந்தன. டோக்கியோ சீமெந்து மற்றும் லங்கா ஹொஸ்பிட்டல்ஸ் ஆகிய பங்குகள் அதிகளவில் கைமாறியிருந்தன. மொத்தப்புரள்வு பெறுமதி 1 பில்லியன் ரூபாவை விட அதிகரித்து நிறைவடைந்திருந்தது. ஜோன் கீல்ஸ் ஹோல்டிங்ஸ் மற்றும் டயலொக் ஆக்சியாடா ஆகியவற்றின் மீதான மொத்த வியாபாரங்கள் மொத்தப்புரள்வு பெறுமதியில் 56 சதவீதத்தை பதிவு செய்திருந்தன. இதேவேளை சந்தை நடவடிக்கைகளில் வெளிநாட்டவர்கள் அதிகளவு ஈடுபாட்டை வெளிப்படுத்தியிருந்தனர். டச்வுட் இன்வெஸ்ட்மன்ட்ஸ் மற்றும் அமானா டகாஃபுல் ஆகிய பங்குகளின் மீது சிறியளவிலான முதலீட்டாளர்கள் ஆர்வத்தை வெளிப்படுத்தியிருந்தனர்.

 

வியாழக்கிழமை

வங்கியியல் சார்ந்த பங்குகளில் அதிகளவு ஈடுபாடு அவதானிக்கப்பட்டது. சம்பத் வங்கி, கொமர்ஷல் வங்கி மற்றும் ஹற்றன் நஷனல் வங்கி ஆகிய பங்குகள் மொத்த வியாபாரத்துக்குள்ளாகியிருந்தன. மொத்தப்புரள்வு பெறுமதி 920 மில்லியன் ரூபாவாக பதிவாகியிருந்ததுடன், இரு சுட்டிகளும் நேர் பெறுமதிகளை பதிவு செய்திருந்தன. ஹேமாஸ் ஹோல்டிங்ஸ் மற்றும் லங்கா ஐஓசி போன்ற நிறுவனங்கள் சார் பங்குகளிலும் ஈடுபாடு காணப்பட்டது. டச்வுட் இன்வெஸ்ட்மன்ட்ஸ், சென்ரல் இன்வெஸ்ட்மன்ட் அன்ட் ஃபினான்ஸ் போன்ற பங்குகள் மீது சிறியளவான முதலீட்டாளர்கள் ஈடுபாட்டை வெளிப்படுத்தியிருந்தனர்.

 

வெள்ளிக்கிழமை

ஜோன் கீல்ஸ் ஹோல்டிங்ஸ், சிலோன் டொபாக்கோ கம்பனி மற்றும் ஸ்ரீலங்கா ரெலிகொம் ஆகிய பங்குகளின் பங்களிப்புடன் பங்குச்சந்தை கொடுக்கல் வாங்கல்கள் நேர் பெறுமதியில் நிறைவடைந்திருந்தன. நெஸ்லே லங்கா மற்றும் லங்கா ஐஓசி ஆகிய பங்குகளின் மீது மொத்த வியாபாரங்கள் அவதானிக்கப்பட்டது. டச்வுட் இன்வெஸ்ட்மன்ட்ஸ் மற்றும் ப்ளு டயமன்ட்ஸ் ஜுவல்லரி ஆகியவற்றின் மீது சிறியளவிலான முதலீட்டாளர்கள் தமது ஆர்வத்தை வெளிப்படுத்தியிருந்தனர். வெளிநாட்டவர்கள் நிகர விற்பனையாளர்களாக பதிவாகியிருந்தனர்.

 

கடந்த வார கொடுக்கல் வாங்கல் நடவடிக்கைகளில் ப்ளு டயமன்ட்ஸ், கிங்ஸ்பரி, சிலோன் லெதர் (உரிமை), பரகன் மற்றும் கலதாரி போன்றன முதல் ஐந்து சிறந்த இலாபமீட்டிய பட்டியலிடப்பட்ட கம்பனிகளாக பதிவாகியிருந்தன. 

 

என்வி றிசோர்சஸ் (உரிமை), மொரிசன்ஸ் (சாதாரண), ஒஃபிஸ் எக்யுப்மன்ட், லங்கா செரமிக் மற்றும் செரண்டிப் என்ஜி. குரூப் போன்ற நிறுவனங்களின் பங்குகள் அதிகளவு நஷ்டமீட்டியதாக பதிவாகியிருந்தன.

தங்கம் மற்றும் வெள்ளி விலை 

கடந்த வாரம் 24 கெரட் தங்கத்தின் சராசரி விலை 46,000 ரூபாவாகவும், 22 கெரட் தங்கத்தின் விலை 42,400 ரூபாவாகவும் அமைந்திருந்ததாக தங்க நகை வியாபார வட்டாரங்களிலிருந்து அறிந்து கொள்ள முடிந்தது. 

 

நாணய மாற்று விகிதம்

கடந்த வாரம் டொலருக்கு நிகரான ரூபாவின் சராசரி விற்பனை பெறுமதி 133.07 ஆக பதிவாகியிருந்தது. ஐக்கிய இராச்சிய பவுணுக்கு நிகரான சராசரி விற்பனை பெறுமதி 215.76 ஆக காணப்பட்டிருந்தது.