பங்குச்சந்தை, தங்கம் விலை மற்றும் நாணயமாற்று வீத நிலவரங்கள்

-ச.சேகர்

கடந்த மூன்று வாரங்களில் பதிவாகிய குறைந்த பெறுமதியை கடந்த வாரம் கொழும்பு பங்குச்சந்தை பதிவு செய்திருந்தது. 

வட்டி வீதங்களில் அதிகரிப்பு ஏற்பட்டமை காரணமாக பங்குச்சந்தையின் மீது முதலீட்டாளர்களின் ஈடுபாடு குறைந்திருந்தமை குறிப்பிடத்தக்கது. வியாழக்கிழமை போயா விடுமுறை தினம் என்பதால் கொடுக்கல் வாங்கல்கள் இடம்பெற்றிருக்கவில்லை. வெள்ளிக்கிழமை நடவடிக்கைகள் நிறைவடைந்த போது அனைத்து பங்கு விலைச் சுட்டெண் 7,183.50 ஆகவும், S&P ஸ்ரீலங்கா 20 சுட்டி 4097.05 ஆகவும் பதிவாகியிருந்தன. 

மார்ச் 02ஆம் திகதியுடன் ஆரம்பமான கடந்த வாரத்தின் இறுதியில் மொத்த பங்கு புரள்வு பெறுமதியாக ரூ. 4,444,932,675 அமைந்திருந்தது. கடந்த வாரம் மொத்தமாக 23,306 பங்கு கொடுக்கல் வாங்கல்கள் இடம்பெற்றன. இதில் உள்நாட்டு கொடுக்கல் வாங்கல்கள் 21,670 ஆகவும் வெளிநாட்டு கொடுக்கல் வாங்கல்கள் 1,636 ஆகவும் பதிவாகியிருந்தன. 

திங்கட்கிழமை

ட்ரான்ஸ் ஏசியா ஹோட்டல்ஸ், சிலோன் டொபாக்கோ கம்பனி மற்றும் ஸ்ரீலங்கா டெலிகொம் போன்றன பங்குகளின் பங்களிப்புடன் சுட்டிகள் மறைபெறுமதிகளை பதிவு செய்திருந்தன. புரள்வு பெறுமதி 642 மில்லியன் ரூபாயை கடந்திருந்தது. 

உயர் தேறிய பெறுமதி வாய்ந்த நிறுவனசார் ஈடுபாடு டிஸ்டிலரீஸ் மற்றும் ஜோன் கீல்ஸ் ஹோல்டிங்ஸ் பங்குகளின் மீது பதிவாகியிருந்தன. கலப்பு ஈடுபாடு சியெர்ரா கேபிள்ஸ், செலான் வங்கி மற்றும் சுவிஸ்டெக் ஆகிய பங்குகளின் மீது பதிவாகியிருந்ததுடன், சிறியளவிலான முதலீட்டாளர்களின் ஈடுபாடு ரெக்னிஸ், மிலேனியம் ஹவுசிங் டிவலப்பர்ஸ் மற்றும் ஜோன் கீல்ஸ் ஹோல்டிங்ஸ் வொரன்ட் 22 ஆகிய பங்குகளின் மீது பதிவாகியிருந்தது. வெளிநாட்டவர்கள் அதிகளவு பங்கு கொள்வனவில் ஈடுபட்டிருந்தனர்.    

செவ்வாய்க்கிழமை

அபவிசு மறை பெறுமதியையும், S&P SL20 நேர் பெறுமதியையும் பதிவு செய்திருந்தன. புரள்வு பெறுமதி 1.8 பில்லியன் ரூபாயை கடந்திருந்தது. உயர் தேறிய பெறுமதி வாய்ந்த நிறுவனசார் ஈடுபாடு ஜோன் கீல்ஸ் ஹோல்டிங்ஸ் பங்குகளின் மீது பதிவாகியிருந்தது. கலப்பு ஈடுபாடு அக்சஸ் என்ஜினியரிங், சியெர்ரா கேபிள்ஸ் மற்றும் டயலொக் ஆக்சியாடா ஆகிய பங்குகளின் மீது பதிவாகியிருந்தன.

சிறியளவிலான முதலீட்டாளர்களின் ஈடுபாடு ரெக்னிஸ், ஜோன் கீல்ஸ் ஹோல்டிங்ஸ் வொரன்ட் 22 மற்றும் வொரன்ட் 23 ஆகியவற்றில் பதிவாகியிருந்தன. இதேவேளை வெளிநாட்டவர்கள் பங்கு கொள்வனவில் அதிகளவு ஈடுபாட்டை பதிவு செய்திருந்தனர். ஜோன் கீல்ஸ் ஹோல்டிங்ஸ் பங்குகளின் மீது அதிகளவு பங்களிப்பு பதிவாகியிருந்தது. 

புதன்கிழமை

டயலொக் ஆக்சியாடா, ஸ்ரீலங்கா டெலிகொம் மற்றும் கார்சன் கம்பர்பெட்ச் ஆகியவற்றின் மீது விலைச்சரிவுகள் காரணமாக புரள்வு பெறுமதி 638 மில்லியன் ரூபாவாக பதிவாகியிருந்தது. 

நேஷன்ஸ் ட்ரஸ்ட் வங்கி, ஜோன் கீல்ஸ் ஹோல்டிங்ஸ் மற்றும் ஹேமாஸ் ஹோல்டிங்ஸ் ஆகியவற்றின் மீது சந்திப்புகள் பதிவாகியிருந்தன. கலப்பு ஈடுபாடு பீபிள்ஸ் லீசிங் அன்ட் ஃபினான்ஸ், அக்சஸ் என்ஜினியரிங் மற்றும் ஆசியா சியாகா கொமோடிடீஸ் ஆகியவற்றின் மீது பதிவாகியிருந்தது. சிறியளவிலான முதலீட்டாளர்களின் ஈடுபாடு ஃபர்ஸ்ட் கெப்பிட்டல் ஹோல்டிங்ஸ், லங்கா ஐஓசி மற்றும் ரெக்னிஸ் பங்குகளின் மீது பதிவாகியிருந்தது. வெளிநாட்டவர்கள் அதிகளவு பங்கு கொள்வனவில் ஆர்வம் செலுத்தியிருந்தனர்.

வெள்ளிக்கிழமை

அபவிசு மறை பெறுமதியில் நிறைவடைந்ததுடன், S&P SL20 நேர் பெறுமதியில் நிறைவடைந்திருந்தது. புரள்வு பெறுமதி 1.3 பில்லியன் ரூபாயை கடந்திருந்தது. உயர் தேறிய பெறுமதி வாய்ந்த நிறுவனசார் ஈடுபாடு டிஸ்டிலரீஸ், ஜோன் கீல்ஸ் ஹோல்டிங்ஸ் மற்றும் நேஷன்ஸ் ட்ரஸ்ட் வங்கி ஆகிய பங்குகளின் மீது பதிவாகியிருந்தது. கலப்பு ஈடுபாடு செலான் வங்கி வாக்குரிமையற்ற பங்குகள், குடுஊ ஹோல்டிங்ஸ் மற்றும் அக்சஸ் என்ஜினியரிங் போன்றவற்றின் மீது பதிவாகியிருந்தது. லங்கா ஐஓசி, ஜோன் கீல்ஸ் ஹோல்டிங்ஸ் வொரன்ட் 22 மற்றும் 23 ஆகியவற்றின் மீது சிறியளவிலான முதலீட்டாளர்களின் ஈடுபாடு பதிவாகியிருந்தது. வெளிநாட்டவர்கள் அதிகளவு பங்கு கொள்வனவில் ஈடுபட்டனர்.    

கடந்த வார கொடுக்கல் வாங்கல் நடவடிக்கைகளில் ரெக்னிஸ், சிஐரி, முல்லர்ஸ், ஏஐஏ இன்சூரன்ஸ் மற்றும் ஏசியா அஸெட் போன்றன முதல் ஐந்து சிறந்த இலாபமீட்டிய பட்டியலிடப்பட்ட கம்பனிகளாக பதிவாகியிருந்தன. 

ஹியுஜே, செலின்சிங், பரகன், ஈ பி கிறீஸி மற்றும் சிட்ரஸ் லெய்ஷர் (உரிமை) போன்ற நிறுவனங்களின் பங்குகள் அதிகளவு நஷ்டமீட்டியதாக பதிவாகியிருந்தன.

தங்கம் விலை நிலவரம்

கடந்த வாரம் 24 கெரட் தங்கத்தின் சராசரி விலை 46,600 ரூபாயாகவும், 22 கெரட் தங்கத்தின் விலை 44,900 ரூபாயாகவும் அமைந்திருந்ததாக தங்க நகை வியாபார வட்டாரங்களிலிருந்து அறிந்து கொள்ள முடிந்தது. தங்கத்தின் விலையில் சற்று உயர்ந்த பெறுமதிகள் பதிவாகியுள்ளதாக தங்க நகை வியாபார வட்டாரங்களிலிருந்து அறிந்து கொள்ள முடிந்தது,

நாணய மாற்று விகிதம்

கடந்த வாரம் டொலருக்கு நிகரான ரூபாவின் சராசரி விற்பனை பெறுமதி 134.63 ஆக பதிவாகியிருந்தது. ஐக்கிய இராச்சிய பவுணுக்கு நிகரான சராசரி விற்பனை பெறுமதி 205.95 ஆக காணப்பட்டிருந்தது.