செலான் வங்கியின் வரிக்குப் பின்னரான இலாபம் ரூ.3 பில்லியனை விட அதிகரிப்பு

2014 டிசெம்பர் 31ஆம் திகதி முடிவடைந்த ஆண்டில் செலான் வங்கியானது சாதனை மிகுந்த வரிக்குப் பின்னரான இலாபமாக ரூபா 3,079 மில்லியனை பதிவு செய்திருக்கின்றது. 2013ஆம் ஆண்டில் பதிவு செய்யப்பட்ட ரூபா 2,316 மில்லியனுடன் ஒப்பிடுகையில் வரிக்குப் பின்னரான இலாபத்தில் ஏற்பட்டுள்ள மனதில் பதியத்தக்கதொரு 33 சதவீதமான வளர்ச்சியாக இது அமைந்துள்ளது.

2014 டிசம்பர் 31ஆம் திகதியன்று முடிவடைந்த 12 மாத காலப்பகுதியில் தேறிய வட்டி வருமானம் ரூபா 9,719 மில்லியனில் இருந்து ரூபா 11,165 மில்லியனாக 14.9% இனால் அதிகரித்துள்ளது. கட்டணம் மற்றும் தரகு வருமானம் ரூபா 2,127 மில்லியனில் இருந்து ரூபா 2,257 மில்லியனாக 6.1% இனால் உயர்வடைந்தமையானது கடந்த பல வருடங்களாக செலான் வங்கி அடையப்பெற்ற திடமான வளர்ச்சிப் போக்கின் ஒன்றுதிரண்ட பெறுபேற்றை வெளிப்படுத்துவதாக காணப்படுகி;ன்றது.

இதேவேளை, வணிக நடவடிக்கையில் இருந்தான தேறிய உழைப்பு, நிதியியல் கருவிகள் மீதான உழைப்பு, வெளிநாட்டு நாணயமாற்று மூலம் கிடைக்கப்பெற்ற உழைப்பு மற்றும் ஏனைய வருமானம் உள்ளடங்கலாக ஏனைய தொழிற்பாட்டு வருமானம் ரூபா 1,023 மில்லியனில் இருந்து ரூபா 2,809 மில்லியனாக 174.61% இனால் குறிப்பிடத்தக்க அளவுக்கு அதிகரித்துள்ளது. அரச பிணையங்களில் இருந்து கிடைக்கப்பெற்ற மூலதன உழைப்புக்களே இதற்கு பிரதான காரணமாக அமைந்தது. 

பரிசீலனைக்கு எடுத்துக்கொள்ளப்பட்ட வருடத்தில் வங்கியானது தனது கிரயத்தை கட்டுப்படுத்துவதில் குறிப்பிடத்தக்க கவனத்தை செலுத்தி செயற்பட்டது. 2014ஆம் ஆண்டில் செலவுகளில் ஏற்படுகின்ற அதிகரிப்பு 10.99% ஆக கட்டுப்படுத்தப்பட்டமை மனதில் பதியத்தக்க இந்த செயற்பாட்டிற்கு ஆதரவளித்திருக்கின்றது. இது 2013ஆம் ஆண்டு  62.59% ஆக பதிவு செய்யப்பட்ட வங்கியின் குறைவடைந்து செல்லும் வருமானத்திற்கான  கிரய வீதத்தினை 2014 இல் 57.37% ஆக குறைவடையச் செய்யும் விடயத்தில் பிரதிபலித்தது. 

ஆண்டின் முதல் அரையாண்டு காலப்பகுதியில் காணப்பட்ட மந்தமான கடன் கேள்வியானது 2014 இன் மூன்றாம் மற்றும் நான்காம் காலாண்டுகளில் ஏற்பட்ட வளர்ச்சிப் போக்கின் காரணமாக அடுத்த அரையாண்டு காலப்பகுதியில் தலைகீழாக மாற்றமடைந்தது. 2013 இல் பதிவு செய்யப்பட்ட ரூபா 136,553 மில்லியன் தேறிய முற்பணம் 2014 இல் ரூபா 154,963 மில்லியனாக உயர்வடைந்த நிலையில், செலான் வங்கியானது 13.48% தேறிய கடன் வளர்ச்சியை பெற்றுள்ளது. 

2014ஆம் ஆண்டில் வங்கி தனது வைப்புத்தளத்தை ரூபா 167,371 மில்லியனில் இருந்து ரூபா 185,924 மில்லியனாக அதிகரித்துக் கொண்டுள்ளது. இவ் வளர்ச்சியானது மிகக் குறிப்பாக நடைமுறை மற்றும் சேமிப்புக் கணக்குகளை 'தயார்நிலைப்படுத்தியதன்' (Mobilization) ஊடாக அடையப் பெற்றுள்ளது. இந்த  நடவடிக்கையின் மூலம் 2013ஆம் ஆண்டு டிசம்பரில் 33% ஆக பதிவு செய்யப்பட்டிருந்த வங்கியின் குறைந்த செலவு வைப்புத் தளத்தை 2014 டிசம்பர் மாத இறுதியில் 39% ஆக உயர்வடையச் செய்வதற்கு செலான் வங்கிக்கு வசதியளித்தது. 

தங்க விலைகளில் ஏற்பட்ட வீழ்ச்சி மற்றும் அதன் விளைவாக அடகு வைக்கும் சேவைத் தளத்தில் ஏற்பட்ட தாக்கம் போன்ற பாதக நிலைமைகளுக்கு மத்தியிலும் 2013ஆம் ஆண்டு டிசம்பரில் 10.58% ஆக பதிவு செய்யப்பட்ட மொத்த செயற்படா சொத்துக்களை (IIS இன் தேறிய பெறுமதி) 2014 டிசம்பர் மாத இறுதியில் 7.69% என்ற ஒற்றை இலக்க மட்டத்திற்கு குறிப்பிடத்தக்களவுக்கு குறைவடையச் செய்தமையின் பலனாக செலான் வங்கியினால் தனது சொத்துத் தரத்தை மேம்படுத்திக் கொள்ள முடிந்தது. அத்துடன் ஒருமுகப்படுத்தப்பட்ட, நிலைபேண்தகு மற்றும் செயற்றிறன் வாய்ந்த மீள்-அறவீட்டு முயற்சிகளின் ஊடாக 2009ஆம் ஆண்டிலிருந்து சொத்துத் தரத்தை மேம்படுத்திக் கொள்ள முடிந்துள்ளது.  

கல்வியை மையமாகக் கொண்ட கூட்டாண்மை சமூகப்பொறுப்பு முன்முயற்சிகளை செலான் வங்கி தொடர்ந்தும் மேற்கொண்டு வருகின்ற அதேநேரம், வசதி குறைந்த பாடசாலைகளுக்கான தனது 100 நூலகங்கள் என்ற செயற்றிட்டத்தை மேலும் விரைவுபடுத்தி இருக்கின்றது. 2014ஆம் ஆண்டில் இவ்வாறான மேலும் 39 பாடசாலை நூலகங்கள் செலான் வங்கியால் திறந்து வைக்கப்பட்டுள்ளன. இதன்படி, இச் செயற்றிட்டத்தின் கீழ் ஒட்டுமொத்தமாக திறந்து வைக்கப்பட்டுள்ள பாடசாலை நூலகங்களின் எண்ணிக்கை 51ஆக அதிகரித்திருக்கின்றது. 

வாடிக்கையாளர்களின் சேவை அனுபவத்தை மேம்படுத்தும் நோக்கத்துடன், கிளைகளை வேறு இடங்களுக்கு இடமாற்றல் மற்றும் தரமேம்படுத்தல் செயற்றிட்டமும் 2014 இல் முழுமூச்சுடன் தொடர்ச்சியாக முன்னெடுக்கப்பட்டது. 2014ஆம் ஆண்டில் 31 சௌகரிய வங்கியியல் நிலையங்கள் முழுமையான வசதியுடைய கிளை அந்தஸ்து கொண்டவையாக தரமுயர்த்தப்பட்டுள்ளன. செலான் வங்கி 6 புதிய கிளைகளை திறந்துள்ளதுடன் மேலும் 12 கிளைகளை முற்றாக புதுப்பொலிவூட்டியுள்ளது. அதேநேரம் இன்னும் 6 கிளைகள் வாடிக்கையாளர்களுக்கு மேலும் நட்புறவான அமைவிடங்களுக்கு இடம் மாற்றப்பட்டு இருக்கின்றன. 2014 டிசம்பர் 31ஆம் திகதி இருந்தவாறு செலான் வங்கியின் சேவை நிலைய வலையமைப்பானது 157 கிளைகள், 177 ATM மையங்கள் மற்றும் 94 மாணவர் சேமிப்பு நிலையங்கள் ஆகியவற்றை உள்ளடக்கியதாக காணப்படுகின்றது. 

2014 ஆம் ஆண்டின் இறுதியில் செலான் வங்கியின் 'மொத்த மூலதன நிறைவு விகிதம்' 14.73% ஆக உயர்ந்த மட்டத்தில் பதிவாகியது. இத்துறையின் ஒழுங்குபடுத்துனரால் வரையறை செய்யப்பட்;;டிருக்கும் மட்டத்தை விடவும் இது மிகவும் அதிகமானதாகும். 2014 ஒக்டோபரில் 'பிட்ச்' (Fitch) ஆனது நிலைமாறாத கண்ணோட்டத்துடன் செலான் வங்கிக்கு 'A-lka' தரப்படுத்தலை உறுதிப்படுத்தியிருக்கின்றது. 

செலான் வங்கி இவ்வாறான சிறந்த தொழிற்பாடுகளை மேற்கொண்டதன் பயனாக, 2014 இல் பங்கொன்றிற்கான உழைப்பு ரூபா 8.92 ஆக காணப்பட்டதுடன்,  (வரிக்கு முன்னரான இலாபத்தில்) சொத்துக்கள் மீதான வருமானம் மற்றும் உரிமையாண்மை மீதான வருமானம் ஆகியவை முறையே 2.05% ஆகவும் 13.45% ஆகவும் உயர்ந்த மட்டத்தில் பதிவாகியது. அதேவேளை, 2014 டிசம்பர் 31ஆம் திகதி இருந்தபடி செலான் வங்கியின் பங்கொன்றிற்கான தேறிய சொத்துப் பெறுமதியானது ரூபா 69.60 ஆக (குழுமம் ரூபா 73.04) காணப்பட்டது.