தடை செய்யப்பட்ட வலை பாவித்தவர்களுக்கு அபராதம்

முல்லைத்தீவு நந்திக்கடல் நீரேரியில் தடை செய்யப்பட்ட முக்கூட்டு வலையை பாவித்த இரண்டு மீனவர்களுக்கு தலா 5000 ரூபாய் அபராதம் விதித்து முல்லைத்தீவு நீதவான் நீதிமன்ற நீதவான் எம்.எஸ்.ஷம்சுதீன், புதன்கிழமை (29) தீர்ப்பளித்தார்.

மீனவர்களிடமிருந்து கைப்பற்றப்பட்ட வலைகளை அழிக்குமாறு முல்லைத்தீவு கடற்றொழில் நீரியல் வளத்துறை திணைக்கள அதிகாரிகளுக்கு நீதவான் உத்தரவிட்டார்.

முல்லைத்தீவு மாவட்ட கடற்றொழில் நீரியல் வளத்துறைத் திணைக்கள உதவிப் பணிப்பாளர் எஸ்.சுதாகரன் தலைமையிலான குழு செவ்வாய்க்கிழமை (28) நந்திக் கடல் நீரேரியில் நடத்திய சோதனை நடவடிக்கையில், முக்கூட்டு வலையை பாவித்து மீன்பிடித்த   இரண்டு மீனவர்களைக் கைது செய்ததுடன் மீனவர்கள் வசம் இருந்த ஒரு தொகுதி முக்கூட்டு வலைகளையும் அதன் மூலம்    பிடிக்கப்பட்ட மீன்களையும் கைப்பற்றினர்.