ஆரம்ப சுகாதார நிலையம் இவ்வாண்டு புனரமைக்கப்படும்

-சுப்பிரமணியம் பாஸ்கரன்

புதுக்குடியிருப்பு - வேணாவில் ஆரம்ப சுகாதார நிலையத்தை, இவ்வாண்டில் புனரமைப்பதற்கு நடவடிக்கைகள் எடுக்கப்பட்டுள்ளதாக, பிராந்திய சுகாதார சேவைகள் பணிமனை தெரிவித்துள்ளது.

கடந்த ஆண்டில், இதனைப் புனரமைப்பதற்கு, பிரதேச செயலகத்தால் எட்டு மில்லியன் ரூபாய் நிதி கிடைக்கப்பெற்ற நிலையில், அதனைப் புனரமைப்பதா அல்லது புதிதாக நிர்மாணிப்பதா என்பதில் இழுபறி நிலை ஏற்பட்டது. இதனால், குறித்த நிதி வேறு அபிவிருத்தி வேலைத்திட்டங்களுக்கு பயன்படுத்தப்பட்டதே தவிர, அந்த நிதி திரும்பிச் செல்லவில்லை.

எனவே, இந்த ஆண்டில் அதற்கான நிதியைப் பெற்று, குறித்த ஆரம்ப சுகாதார நிலையத்தைப் புனரமைப்பதற்கு நடவடிக்கை எடுக்கப்படும் எனவும் பிராந்திய சேவைகள் பணிமனையால் மேலும் தெரிவிக்கப்பட்டுள்ளது.