லேஸியோவிடம் தோற்ற ஜுவென்டஸ்

இத்தாலிய கால்பந்தாட்டக் கழகங்களுக்கிடையிலான சீரி ஏ தொடரில், லேஸியோவின் மைதானத்தில் இன்று அதிகாலை நடைபெற்ற அவ்வணியுடனான போட்டியில் 1-3 என்ற கோல் கணக்கில் நடப்புச் சம்பியன்களான ஜுவென்டஸ் தோற்றது.

ஜுவென்டஸ் சார்பாகப் பெறப்பட்ட கோலை கிறிஸ்டியானோ ரொனால்டோ பெற்றார். லேஸியோ சார்பாக, லூயிஸ் பிலிப் றாமோஸ் மர்ஷி, சேர்ஜி மிலிங்க்கோவிச்-சவிச், பிலிப் கைசெடோ ஆகியோர் தலா ஒவ்வொரு கோலைப் பெற்றனர்.

இந்நிலையில், உடினீஸின் மைதானத்தில் நேற்றிரவு நடைபெற்ற அவ்வணியுடனான போட்டியை 1-1 என்ற கோல் கணக்கில் சமநிலையில் நாப்போலி முடித்துக் கொண்டிருந்தது. நாப்போலி சார்பாகப் பெறப்பட்ட கோலை பியோத்தர் ஸிலென்ஸ்கி பெற்றிருந்தார். உடினீஸ் சார்பாகப் பெறப்பட்ட கோலை கெவின் லஸக்னா பெற்றிருந்தார்.

இதேவேளை, தமது மைதானத்தில் நடைபெற்ற ஹெலாஸ் வெரோனாவுடனான போட்டியில் 3-2 என்ற கோல் கணக்கில் அத்லாண்டா வென்றிருந்தது. அத்லாண்டா சார்பாக, ருஸ்லன் மலினோஸ்கி, லூயிஸ் ஃபெர்ணான்டோ முரியெல் ஃப்ரூட்டோ, பெரட் டிஜிம்சிட்டி ஆகியோர் தலா ஒவ்வொரு கோலைப் பெற்றிருந்தனர். ஹெலாஸ் வெரோனா சார்பாகப் பெறப்பட்ட இரண்டு கோல்களையும் சாமுவேல் டி கர்மினே பெற்றிருந்தார்.