கருவாடுகளை திருடி விற்பனை செய்த இருவர் கைது

(எஸ்.மாறன்)

கல்முனை கடற்கரையில் உலரவைத்த திருக்கை மீன் கருவாடுகளை திருடிச்சென்று சந்தையில் விற்பனை செய்ததாக கூறப்படும் இருவர் 20 கிலோ கருவாடுகளுடன் பொலிஸாரால் நேற்று ஞாயிற்றுக்கிழமை கைதுசெய்யப்பட்டுள்ளனர். 

தங்களுக்கு கிடைத்த தகவலொன்றையடுத்து,  அம்பாறை நகர் வாராந்த சந்தையில் நேற்று ஞாயிற்றுக்கிழமை காலை 9 மணியளவில் திடீர் சோதனை நடவடிக்கையில் ஈடுபட்டபோது இவர்கள் கைதுசெய்யப்பட்டதாக பொலிஸார் தெரிவித்தனர்.

கல்முனைக்குடி வாசிகளான இந்த இருவரும் கல்முனை கடற்கரையில் மீனவர்கள் உலரவைத்த கருவாடுகளை இரவு வேளையில் திருடிச் சென்று  வாராந்த சந்தையில் விற்பனை செய்ததாக பொலிஸார் கூறினர்.

கைதுசெய்யப்பட்டவர்களை நீதிமன்றத்தில் ஆஜர்படுத்துவதற்கான  நடவடிக்கை எடுக்கப்பட்டுள்ளதாகவும் பொலிஸார் குறிப்பிட்டனர்.

இது தொடர்பான மேலதிக விசாரணைகளை அம்பாறை நகர பொலிஸார் மேற்கொண்டு வருகின்றனர்.