இந்தியப் படகுடன் 10 மீனவர்கள் கைது

இலங்கை எல்லைக்குட்பட்ட மன்னாருக்கு வடக்கே உள்ள கடல் பகுதியில், 2026 ஏப்ரல் 08 ஆம் திகதி இரவு கடற்படையினர் மேற்கொண்ட சிறப்புத் தேடுதல் நடவடிக்கையின்போது, சட்டவிரோத மீன்பிடி நடவடிக்கைகளில் ஈடுபட்ட ஓர் இந்திய மீன்பிடிப் படகையும் அதிலிருந்த பத்து (10) மீனவர்களையும் கடற்படையினர் கைது செய்தனர்.

2026 ஏப்ரல் 08 ஆம் திகதி இரவு, மன்னாருக்கு வடக்கே இலங்கை நீர்ப்பரப்பிற்குள் நுழைந்து சட்டவிரோத மீன்பிடித் தொழிலில் ஈடுபட்டிருந்த பல இந்தியப் படகுகளை வடமத்திய கடற்படை கட்டளையினர் கண்காணித்தனர். அப்படகுகளை இலங்கைக் கடற்பரப்பிலிருந்து அப்புறப்படுத்துவதற்காக, கடற்படைக் கட்டளையகத்துடன் இணைக்கப்பட்ட கப்பல்கள் மூலம் சிறப்பு நடவடிக்கை முன்னெடுக்கப்பட்டது.

இதன்போது, தொடர்ந்து அத்துமீறி மீன்பிடியில் ஈடுபட்டிருந்த ஓர் (01) இந்தியப் படகைக் கடற்படையினர் வழிமறித்துச் சோதனையிட்டனர். அதனடிப்படையில், எல்லைச் சட்டங்களை மீறி மீன்பிடித்த குற்றத்திற்காக ஒரு படகுடன் பத்து (10) இந்திய மீனவர்கள் அதிகாரப்பூர்வமாகக் கைது செய்யப்பட்டனர்.

கைது செய்யப்பட்ட மீனவர்களும் அவர்களது படகும் மேலதிக சட்ட நடவடிக்கைகளுக்காகக் கிளிநொச்சி மீன்வளத் திணைக்கள ஆய்வாளரிடம் ஒப்படைக்கப்பட்டனர்.