இன்று 12:12 க்கு நிழல் மாயமாகும்

இன்று (09) நண்பகல் சுமார் 12:12 மணியளவில் நாட்டின் சில பகுதிகளில் சூரியன் நேர் உச்சியில் காணப்படும். சிலாபம், பிங்கிரிய, ஹல்மில்லவெவ, பண்டுவஸ்நுவர, கொக்கரெல்ல, கௌடுபெலெல்ல, கொப்பவெலி மற்றும் கிரங்குளம் ஆகிய பகுதிகள் இதற்கு மிக அருகாமையில் உள்ள பகுதிகளாக அடையாளம் காணப்பட்டுள்ளன.

சூரியனின் தோற்ற வடதிசை சார்பு இயக்கத்தின் காரணமாக இந்த நிகழ்வு ஏற்படுகிறது என வானிலை ஆய்வுத் திணைக்களம் அறிவித்துள்ளது. இதன் விளைவாக, இந்த ஆண்டு ஏப்ரல் 15 வரை இலங்கையின் பல்வேறு அட்சரேகைகளில் சூரியன் நேர் உச்சியில் காணப்படும்.

இந்தக் காலகட்டத்தில், தீவு முழுவதும் உள்ள இடங்களில் சூரியன் அதன் உச்சத்தில் காணப்படும். அதாவது, நண்பகலில் சூரியன் நேர் உச்சியில் தோன்றுவதால், செங்குத்தான பொருட்களுக்கு மிகக் குறைந்த அல்லது நிழலே ஏற்படாது.

பூமியின் சாய்வு மற்றும் சுற்றுப்பாதையுடன் தொடர்புடைய ஒரு இயற்கையான வருடாந்திர நிகழ்வே இது என்றும், பூமத்திய ரேகைப் பகுதி முழுவதும் சூரியனின் தோற்ற இயக்கத்தின் மாற்றத்தைக் குறிக்கிறது என்றும் அதிகாரிகள் தெரிவித்தனர்.