நாடு, நகர திட்டமிடல் சட்டமூலம் கிழக்கு மாகாண சபையில் நிராகரிப்பு

(றிப்தி அலி, ரி.லோஹித்)

நாடு மற்றும் நகர திட்டமிடல் திருத்த சட்டமூலம் கிழக்கு மாகாண சபையினால் இன்று செவ்வாய்க்கிழமை ஏகமனாதாக நிராகரிக்கப்பட்டுள்ளது என மாகாண சபையின் தவிசாளர் எச்.எம்.எம்.பாயிஸ் தமிழ்மிரர் இணையத்தளத்திற்கு தெரிவித்தார்.

ஆனால் இச்சட்டமூலத்தில் மேற்கொள்ளப்பட்ட வேண்டிய சில திருத்தங்கள் கிழக்கு மாகாணத்தினால் மத்திய அரசுக்கு முன்மொழியப்பட்டுள்ளது எனவும் அவர் குறிப்பிட்டார்.

மார்ச் மாத்திற்கான கிழக்கு மாகாண சபையின் அமர்வு இன்று செவ்வாய்க்கிழமை இடம்பெற்ற போதே குறித்த சட்டமூலம் ஏகமனதாக நிராகரிக்கப்பட்டள்ளது. அத்துடன் இச்சட்டமூலம் தொடர்பிலான பரிந்துரைகளை மத்திய அரசுக்கு அனுப்பிவைப்பது எனவும் இதன்போது தீர்மானிக்கப்பட்டது.

கிழக்கு மாகாகாண சபையில் கடந்த பெப்ரவரி 13ஆம் திகதி இடம்பெற்ற விசேட அமர்வின் போது  நாடு மற்றும் நகர திட்டமிடல் திருத்த சட்டமூலம் சமர்ப்பிக்கப்பட்டது.  ஆனால், எதிர்க்கட்சி உறுப்பினர்களின் குழப்ப நிலையையடுத்து கிழக்கு மாகாண சபையின் குறித்த அமர்வு பெப்ரவரி 28ஆம் திகதி வரை ஒத்திவைக்கப்பட்டது.

இந்நிலையில் கிழக்கு மாகாண சபையின் அமர்வு மீண்டும் இன்று செவ்வாய்க்கிழமையே கூடியது. இதன்போதே, நாடு மற்றும் நகர திட்டமிடல் திருத்த சட்டமூலம் ஏகமனதாக நிராகரிக்கப்பட்டது.