குளிர்கால ஒலிம்பிக்கில் வடகொரியா?

அடுத்தாண்டு நடைபெறவுள்ள குளிர்கால ஒலிம்பிக்கில், வடகொரியா பங்குபற்றுவதற்கு உதவுமாறு, சர்வதேச ஒலிம்பிக் செயற்குழுவிடம், தென்கொரிய ஜனாதிபதி மூன் ஜே-இன் கோரிக்கை விடுத்துள்ளார். அவ்வாறு பங்குபற்றினால், பிராந்தியத்தினதும் உலகினதும் அமைதிக்கு அது பங்களிக்குமென அவர் தெரிவித்தார்.

அடுத்த குளிர்கால ஒலிம்பிக் போட்டிகள், தென்கொரியாவில் இடம்பெறவுள்ள நிலையிலேயே, இக்கோரிக்கை முன்வைக்கப்பட்டுள்ளது.

எதிரும் புதிருமாக உள்ள இந்த இரண்டு நாடுகளும், ஒன்றாக இணைந்து, ஒரே அணியில் பங்குபற்ற வேண்டுமெனவும், அவர் தெரிவித்துள்ளார்.

ஆனால், இந்தக் கோரிக்கை ஏற்கப்பட்டாலும் கூட, வடகொரிய வீரர்கள் பங்குபற்றுவார்களா என்ற சந்தேகம் காணப்படுகிறது. ஏனெனில், குளிர்கால ஒலிம்பிக் போட்டிகளுக்கு, எந்தவொரு வடகொரிய வீரரும், இதுவரை தகுதி பெறவில்லை என்பது குறிப்பிடத்தக்கது.