டோக்கியோ 2020: தோல்வியையடுத்து திருமண முன்மொழிவு

ஜப்பானில் நடைபெற்றுவரும் டோக்கியோ 2020 ஒலிம்பிக் போட்டிகளிலிருந்து வெளியேற்றப்பட்டதையடுத்து ஆர்ஜென்டீனாவின் பென்சிங் வீராங்கனையான மரியா பெலென் பெரேஸ் மெளரிஸ், அவரது பயிற்சியாளர் லூகாஸ் குய்ல்லெர்மோ செளசெடோவிலிருந்து “தயவு செய்து நீ என்னைத் திருமணம் செய்து கொள்கின்றாயா” என்ற கையெழுத்தால் எழுதப்பட்ட பதாதையை கண்டுள்ளார்.

 17 ஆண்டுகளாக மெளரிஸேயின் துணை, பயிற்சியாளராக இருக்கும் செளசெடோவின் இரண்டாவது முயற்சி இது என்பது குறிப்பிடத்தக்கது. கடந்த 2010ஆம் ஆண்டு செளசெடோவின் முன்மொழிவு நிராகரிக்கப்பட்டிருந்தது.

இந்நிலையில், இம்முறை ஆம் என மெளரிஸே பதிலளித்திருந்தார்.

ஹங்கேரியின் அன்னா மார்டனுடனான இறுதி 32 பேருக்கான சுற்றுப் போட்டியில் 12-15 என்ற புள்ளிகள் கணக்கில் மெளரிஸே தோற்றமையை அடுத்தே இச்சம்பவம் இடம்பெற்றிருந்தது.