மியாமி பகிரங்க டென்னிஸ் தொடர்: காலிறுதியில் குவிற்றோவா, ஹலெப்

ஐக்கிய அமெரிக்காவின் புளோரிடாவில் இடம்பெற்றுவரும் மியாமி பகிரங்க டென்னிஸ் தொடரின் காலிறுதிப் போட்டிக்கு, உலகின் இரண்டாம்நிலை வீராங்கனையான பெட்ரா குவிற்றோவா, உலகின் மூன்றாம்நிலை வீராங்கனையான சிமோனா ஹலெப் ஆகியோர் தகுதிபெற்றுள்ளனர்.

நேற்றிரவு இடம்பெற்ற தனது நான்காவது சுற்றுப் போட்டியில், பிரான்ஸின் கரோலின் கர்சியாவை எதிர்கொண்ட செக் குடியரசின் பெட்ரா குவிற்றோவா, 6-3, 6-3 என்ற நேர் செட்களில் வென்று காலிறுதிப் போட்டிக்குத் தகுதிபெற்றார்.

இதேவேளை, இன்று அதிகாலை இடம்பெற்ற தனது நான்காவது சுற்றுப் போட்டியில், ஐக்கிய அமெரிக்காவின் வீனஸ் வில்லியம்ஸை எதிர்கொண்ட றோமானியாவின் சிமோனா ஹலெப், 6-3, 6-3 என்ற நேர் செட்களில் வென்று காலிறுதிப் போட்டிக்குத் தகுதிபெற்றனர்.

இந்நிலையில், இன்று அதிகாலை இடம்பெற்ற தனது நான்காவது சுற்றுப் போட்டியில், கஸக்ஸ்தானின் யூலியா புட்டின்ட்சேவாவை எதிர்கொண்ட உலகின் ஏழாம்நிலை வீராங்கனையான செக் குடியரசின் கரோலினா பிளிஸ்கோவா, 2-6, 6-3, 7-5 என்ற செட் கணக்கில் வென்று காலிறுதிப் போட்டிக்குத் தகுதிபெற்றார்.

இதேவேளை, நேற்றிரவு இடம்பெற்ற தனது நான்காவது சுற்றிப் போட்டியில், அவுஸ்திரேலியாவின் அஷ்லெய் பார்ட்டியை எதிர்கொண்ட உலகின் எட்டாம்நிலை வீராங்கனையான நெதர்லாந்தின் கிகி பேர்ட்டன்ஸ், 6-4, 3-6, 2-6 என்ற செட் கணக்கில் தோல்வியடைந்து தொடரிலிருந்து வெளியேறினார்.

இந்நிலையில், இன்று அதிகாலை இடம்பெற்ற தனது மூன்றாவது சுற்றுப் போட்டியில், 7-5, 6-3 என்ற நேர் செட்களில் சேர்பியாவின் பிலி கிறஜினோவிச்சை வென்ற உலகின் ஐந்தாம்நிலை வீரரான சுவிற்ஸர்லாந்தின் ரொஜர் பெடரர், நான்காவது சுற்றுப் போட்டிக்கு முன்னேறினார்.

இதேவேளை, நேற்றிரவு இடம்பெற்ற தனது மூன்றாவது சுற்றுப் போட்டியில், போர்த்துக்கல்லின் ஜோவா சூஸாவை 6-4, 7-6 (8-6) என்ற நேர் செட்களில் வென்ற உலகின் ஏழா,ம்நிலை வீரரான தென்னாபிரிக்காவின் கெவின் அன்டர்சன், நான்காவது சுற்றுப் போட்டித் தகுதிபெற்றார்.

இந்நிலையில், இன்று அதிகாலை இடம்பெற்ற தனது மூன்றாவது சுற்றுப் போட்டியில், ஆர்ஜென்டீனாவின் லியனார்டோ மேயரை 6-4, 6-4 என்ற நேர் செட்களில் வென்ற கிரேக்கத்தின் ஸ்டெபனோஸ் சிட்டிபாஸ், நான்காவது சுற்றுப் போட்டிக்குத் தகுதிபெற்றார்.