ஆஸ்திரேலிய இராணுவத்தின் முதல் பெண் தளபதி நியமனம்

ஆஸ்திரேலியப் பாதுகாப்புப் படையில் (ADF) பெரும் மாற்றங்களை பிரதமர் அந்தோணி அல்பானிஸ் அறிவித்துள்ளார். குறிப்பாக, ஆஸ்திரேலிய இராணுவ வரலாற்றிலேயே முதல் முறையாக ஒரு பெண் இராணுவத் தளபதியாக நியமிக்கப்பட்டுள்ளார்.

இராணுவத் தளபதி (Chief of Army): லெப்டினன்ட் ஜெனரல் சூசன் (Susan Coyle) புதிய தளபதியாக நியமிக்கப்பட்டுள்ளார். இவர் 2022 முதல் பணியாற்றி வரும் லெப்டினன்ட் ஜெனரல் சைமன் ஸ்டுவர்ட்டிற்குப் பதிலாகப் பொறுப்பேற்பார்.

பாதுகாப்புப் படைத் தளபதி (Chief of Defence): தற்போதைய கடற்படைத் தளபதி வைஸ் அட்மிரல் மார்க் ஹம்மண்ட், அட்மிரல் டேவிட் ஜான்ஸ்டனுக்குப் பிறகு ஒட்டுமொத்த பாதுகாப்புப் படைத் தளபதியாகப் பொறுப்பேற்பார்.

கடற்படைத் தளபதி (Chief of Navy): ரியர் அட்மிரல் மெத்யூ பக்லி புதிய கடற்படைத் தளபதியாக நியமிக்கப்பட்டுள்ளார்.

தனது பதவி உயர்வு குறித்து ஊடகங்களிடம் பேசிய வைஸ் அட்மிரல் ஹம்மண்ட் (இனி அட்மிரல் என அழைக்கப்படுவார்):

"இது எனது வாழ்க்கையிலேயே மிகவும் பணிவான தருணம். ஆஸ்திரேலியாவின் மாலுமிகள், வீரர்கள் மற்றும் விமானிகளுக்காக, வரவிருக்கும் சவாலான காலங்களில் பாதுகாப்புப் படைத் தளபதியாக பணியாற்றுவதை ஆவலுடன் எதிர்பார்க்கிறேன்."

செங்கடல் மற்றும் ஹார்முஸ் நீரிணை பகுதிகளில் ஆஸ்திரேலியக் கடற்படையின் தயார் நிலை குறித்துப் பேசிய அவர், உலகின் அதிநவீன ராடார்கள் மற்றும் ஏவுகணைத் தடுப்பு அமைப்புகளை ஆஸ்திரேலியக் கப்பல்கள் கொண்டுள்ளதாக உறுதி அளித்தார்.

பாதுகாப்புத் துறை அமைச்சர் ரிச்சர்ட் மார்லஸ் இது குறித்துக் கூறுகையில், லெப்டினன்ட் ஜெனரல் சூசன் கோய்ல் இந்த பதவிக்கு மிகவும் தகுதியானவர் என்று குறிப்பிட்டார்.

 "ஒரு பெண் இராணுவத் தளபதியாக நியமிக்கப்படுவது ஆஸ்திரேலியப் பாதுகாப்புப் படையில் உள்ள பெண்களுக்கும், எதிர்காலத்தில் இணைய நினைக்கும் பெண்களுக்கும் ஒரு ஆழ்ந்த உத்வேகத்தைத் தரும்," என்று அவர் தெரிவித்தார்.

 சூசன் கோய்ல் இராணுவத்தில் சுமார் 40 ஆண்டுகள் அனுபவம் கொண்டவர். இவர் திமோர் லெஸ்தே, ஆப்கானிஸ்தான் மற்றும் மத்திய கிழக்கு நாடுகளில் பணியாற்றிய அனுபவம் மிக்கவர். அமெரிக்க இராணுவப் போர் கல்லூரி மற்றும் ஹார்வர்ட் பல்கலைக்கழகத்தில் பயின்றவர் என்பது குறிப்பிடத்தக்கது.

  பென் ராபர்ட்ஸ்-ஸ்மித் தொடர்பான கைது விவகாரங்களால் ஆஸ்திரேலியப் பாதுகாப்புப் படை சர்ச்சைக்குள்ளாகியிருக்கும் நிலையில், இந்த அதிரடி மாற்றங்கள் மற்றும் புதிய தலைமைத்துவம் முக்கியத்துவம் வாய்ந்ததாகப் பார்க்கப்படுகிறது. வரும் புதன்கிழமை ஆஸ்திரேலியாவின் தேசிய பாதுகாப்பு வியூகம் குறித்த புதிய அறிவிப்புகளை அமைச்சர் ரிச்சர்ட் மார்லஸ் வெளியிடுவார் என எதிர்பார்க்கப்படுகிறது.