மத்திய சுற்றாடல் அதிகாரசபையினால் வருடாந்தம் ஏற்பாடு செய்யப்படும் "ஜனாதிபதி சுற்றாடல் விருதுகள் – 2026" நிகழ்ச்சித் திட்டத்திற்கான விண்ணப்பங்களைக் கோரும் பணிகள் ஆரம்பிக்கப்பட்டுள்ளன.
ஆர்வமுள்ள தரப்பினர் 2026 ஏப்ரல் 30 ஆம் திகதிக்கு முன்னர் விண்ணப்பங்களை சமர்ப்பிக்குமாறு மத்திய சுற்றாடல் அதிகாரசபை அழைப்பு விடுத்துள்ளது. இம்முறை விருதுகள் மூன்று பிரதான பிரிவுகளின் கீழ் வழங்கப்படவுள்ளன:
1. கைத்தொழில் துறை (Industry Sector)
இது பாரிய அளவிலான கைத்தொழில்கள் மற்றும் சிறு/நடுத்தர அளவிலான கைத்தொழில்கள் என இரண்டு உப பிரிவுகளைக் கொண்டுள்ளது.
• பாரிய அளவிலான கைத்தொழில்கள்: கழிவு மேலாண்மை, இரசாயனத் தொழில்கள், வாகன சேவை மையங்கள், உணவு மற்றும் பான உற்பத்தி, ஹோட்டல்கள், ஆடைத் தொழிற்சாலைகள், வைத்தியசாலைகள் மற்றும் ரப்பர் சார்ந்த தயாரிப்புகள் உட்பட 16 துறைகளின் கீழ் விண்ணப்பங்கள் கோரப்பட்டுள்ளன.
• சிறு மற்றும் நடுத்தர கைத்தொழில்கள்: வைத்தியசாலைகள் மற்றும் அச்சிடல் துறையைத் தவிர்த்து ஏனைய 14 பிரிவுகளின் கீழ் விண்ணப்பங்கள் கோரப்பட்டுள்ளன.
2. திட்டங்கள் துறை (Projects Sector)
இப்பிரிவு புதுப்பிக்கத்தக்க எரிசக்தி திட்டங்களை உள்ளடக்கியது. இதில் சிறு நீர்மின் திட்டங்கள், சூரிய சக்தி திட்டங்கள் (Rooftop தவிர்ந்தவை) மற்றும் காற்று சக்தி திட்டங்கள் என மூன்று பிரிவுகளின் கீழ் விருதுகள் வழங்கப்படும்.
3. நிறுவனங்கள், ஊடகங்கள் மற்றும் சமூகத் துறை
பாடசாலைகள், அரச நிறுவனங்கள், தனியார் நிறுவனங்கள், கழிவு மேலாண்மையில் ஈடுபடும் உள்ளூராட்சி மன்றங்கள், பொலிஸ் சுற்றாடல் பிரிவுகள் மற்றும் தன்னார்வத் தொண்டு நிறுவனங்கள் (NGO) இப்பிரிவில் அடங்கும்.
• ஊடகத் துறை: வெகுஜன ஊடகங்கள் (பத்திரிகை, தொலைக்காட்சி, வானொலி) மற்றும் சமூக ஊடகங்கள் (Facebook, YouTube) என இரு பிரிவுகளாக மதிப்பீடு செய்யப்படும். அனைத்து மொழி ஊடகங்களும் ஒன்றாகவே பரிசீலிக்கப்படும்.
விருதுகள் மற்றும் மதிப்பீடு
துறைசார் நிபுணர்குழுவினால் விண்ணப்பங்கள் மதிப்பீடு செய்யப்பட்டு தங்கம், வெள்ளி, வெண்கலம் மற்றும் தகுதிச் சான்றிதழ்கள் என விருதுகள் வழங்கப்படும். விசேட அம்சமாக, இந்த விருதுகள் மீள்சுழற்சி செய்யப்பட்ட அலுமினியக் கேன்களில் (Recycled aluminium cans) இருந்து தயாரிக்கப்படவுள்ளன.
விண்ணப்பிக்கும் முறை
மேலதிக விபரங்கள் மற்றும் விண்ணப்பப் படிவங்களை மத்திய சுற்றாடல் அதிகாரசபையின் உத்தியோகபூர்வ இணையத்தளமான www.cea.lk இல் பெற்றுக்கொள்ளலாம். அல்லது பின்வரும் தொலைபேசி எண்களைத் தொடர்பு கொள்ளலாம்:
• அலுவலகம்: 0112873447, 0112872278
• உடனடி அழைப்பு (Hotline): 0112888999
இந்த விருது வழங்கும் விழா 2026 ஒக்டோபர் மாதம் ஜனாதிபதியின் தலைமையில் பண்டாரநாயக்க சர்வதேச மாநாட்டு மண்டபத்தில் (BMICH) நடைபெறவுள்ளது. "செழிப்பான தேசம் - அழகான வாழ்வு" (A Thriving Nation A Beautiful Life) எனும் அரசாங்கத்தின் கொள்கைத் திட்டத்திற்கு அமைவாக இந்தத் திட்டம் முன்னெடுக்கப்படுகின்றது.
