யூனியன்ஸ், நியுஸ்டார்ஸ் அணிகள் வெற்றி

Kogilavani / 2014 மே 16 , மு.ப. 06:06 - 0 - {{hitsCtrl.values.hits}}

- குணசேகரன் சுரேன்

யாழ்ப்பாணம் பிறிமியர் லீக் சுற்றுப்போட்டியில் புதன்கிழமை (14) இடம்பெற்ற போட்டியில் தெல்லிப்பளை யூனியன்ஸ் மற்றும் கந்தர்மடம் நியுஸ்டார்ஸ் அணிகள் வெற்றிபெற்றன.

யுவ பிரண்ட்ஸ் பவுண்டேஷன் நிறுவனத்தில் ஏற்பாட்டில் யாழ்ப்பாணம் பிறிமியர் லீக் என்று அழைக்கப்படும் இருபது–20 துடுப்பாட்டச் சுற்றுப்போட்டி யாழ்ப்பாணம் இந்துக் கல்லூரி மைதானத்தில் நடைபெற்று வருகின்றது.

யாழ்.மாவட்டத்தினைச் சேர்ந்த 18 துடுப்பாட்ட அணிகள் பங்குபற்றுகின்ற இந்த சுற்றுப்போட்டியில் புதன்கிழமை இரண்டு ஆட்டங்கள் இடம்பெற்றன.

முதலாவது ஆட்டத்தில் தெல்லிப்பளை யூனியன்ஸ் விளையாட்டுக்கழக அணியினை எதிர்த்து சுழிபுரம் விக்டோரியன்ஸ் விளையாட்டுக்கழகம் மோதியது.

நாணயச் சுழற்சியில் வெற்றிபெற்று முதலில் துடுப்பெடுத்தாடிய யூனியன்ஸ் அணி 20 பந்துபரிமாற்றங்களில் 9 இலக்குகளை இழந்து 200 ஓட்டங்களைப் பெற்றது. துடுப்பாட்டத்தில் எஸ்.சதீஸ்கண்ணா 60, ஆர்.ஆகீஸன் 34 ஓட்டங்களைப் பெற்றனர்.

பந்துவீச்சில் விக்டோரியன்ஸ் சார்பாக எஸ்.சிந்துஜன் 3, எம்.சுரேந்தர் 2 இலக்குகளைக் கைப்பற்றினார்கள்.

201 என்ற வெற்றியிலக்குடன் பதிலுக்குத் துடுப்பெடுத்தாடக் களமிறங்கிய விக்டோரியன்ஸ் அணி 17.1 பந்துபரிமாற்றங்களில் 130 ஓட்டங்களுக்குச் சகல இலக்குகளையும் இழந்தது. துடுப்பாட்டத்தில் கே.கஜேந்திரன் 34 ஓட்டங்களைப் பெற்றார்.

பந்துவீச்சில் யூனியன்ஸ் அணி சார்பாக எஸ்.தயாளன் 3, எம்.மகிதரன், பி.பிரசாந்தன். எம்.கலிராஜ் ஆகியோர் தலா 2 இலக்குகளைக் கைப்பற்றினார்கள்.

இப்போட்டியின் ஆட்டநாயகனாக எஸ்.சதீஸ்கண்ணா தெரிவு செய்யப்பட்டார்.

இரண்டாவது போட்டியில் நியுஸ்டார்ஸ் அணியினை எதிர்த்து அரியாலை ஜக்கிய விளையாட்டுக்கழக அணி மோதியது.

நாணயச் சுழற்சியில் வென்று முதலில் துடுப்பெடுத்தாடிய நியுஸ்டார்ஸ் அணி 20 பந்துப்பரிமாற்றங்களில் 7 இலக்குகளை இழந்து 131 ஓட்டங்களைப் பெற்றது.

துடுப்பாட்டத்தில் எஸ்.றம்மியராகுலன் 37, ஆர்.மோகனதீபன் 32 ஓட்டங்களைப் பெற்றுக்கொடுத்தனர். பந்துவீச்சில் அரியாலை அணி சார்பாக இ.இனகநாதன், எஸ்.ஜெயரூபன் தலா 2 இலக்குகளைக் கைப்பற்றினார்.

தொடர்ந்து 132 ஓட்டங்கள் பெற்றால் வெற்றியென்ற இலக்குடன் பதிலுக்குத் துடுப்பெடுத்தாடக் களமிறங்கிய அரியாலை ஜக்கிய அணி, 18.2 பந்துபரிமாற்றங்களில் 109 ஓட்டங்களுக்குச் சகல இலக்குகளையும் இழந்தது. துடுப்பாட்டத்தில் எஸ்.நிரோசன் 47 ஓட்டங்களைப் பெற்றுக்கொடுத்தார்.

பந்துவீச்சில் நியுஸ்ரார்ஸ் அணி சார்பாக எம்.றொசான் 5 இலக்குகளைக் கைப்பற்றி போட்டியின் ஆட்டநாயகனாகத் தெரிவு செய்யப்பட்டார்.

Comments - 0

அன்புள்ள வாசகர்களே,
நீங்கள் தெரிவிக்கும் கருத்துகளுக்கு நிர்வாகம் எவ்விதத்திலும் பொறுப்பாகாது. அவை உங்களின் தனிப்பட்ட கருத்துகளாகும். உங்களின் கருத்துகள் ஆசிரியரின் தகுந்த தணிக்கைக்குப் பிறகே பதிவேற்றம் செய்யப்படும் என்பதைக் கவனத்திற்கொள்க. உங்கள் யோசனைகளையும் எங்களுக்கு அனுப்புங்கள். .