பாகிஸ்தானுக்கு வெற்றி

பாகிஸ்தான், அவுஸ்திரேலியா அணிகளுக்கிடையில் நடைபெற்ற முதலாவது டெஸ்ட் போட்டியில் பாகிஸ்தான் அணி 221 ஓட்டங்களினால் வெற்றி பெற்றுள்ளது. போட்டியின் ஐந்தாம் நாளான இன்று 438 ஓட்டங்கள் என்ற வெற்றி இலக்குடன் துடுப்பாடிய அவுஸ்திரேலியா அணி, சகல விக்கெட்களையும் இழந்து 216 ஓட்டங்களை மாத்திரமே பெற்றது. இதில் மிச்சல் ஜோன்சன் 61 ஓட்டங்களையும், ஸ்டீபன் ஸ்மித் 55 ஓட்டங்களையும் பெற்றனர். பந்துவீச்சில் சுல்பிகர் பாபர் 5 விக்கெட்களையும், யசீர் ஷா 4 விக்கெட்களையும் கைப்பற்றினர். 

 

பாகிஸ்தான் அணி தமது இரண்டாம் இன்னிங்சில் 2 விக்கெட்களை இழந்து 286 ஓட்டங்களைப் பெற்றது. இதில் அஹமட் செஷாட் 131 ஓட்டங்களையும், யூனுஸ் கான் ஆட்டமிழக்காமல் 103 ஓட்டங்களையும் பெற்றனர். ஸ்டீப் ஓ கொபி 2 விக்கெட்களைக் கைப்பற்றினார். 

 

முன்னதாக பாகிஸ்தான் அணி தமது முதல் இன்னிங்சில் சகல விக்கெட்களையும் இழந்து 454 ஓட்டங்களைப் பெற்றது. இதில் சப்ராஸ் அஹமட் 109 ஓட்டங்களையும், யூனுஸ்கான் 106 ஓட்டங்களையும், ஆசட் சபிக்  89 ஓட்டங்களையும், மிஸ்பா உல் ஹக் ஆட்டமிழக்காமல் 69 ஓட்டங்களையும் பெற்றனர். பந்துவீச்சில் மிச்சல் ஜோன்சன் 3 விக்கெட்களையும், ஸ்டீவ் ஓ கொபி, நேதன் லயோன் ஆகியோர் தலா 2 விக்கெட்களைக் கைபப்ற்றினர். அவுஸ்திரேலியா அணி தமது முதல் இன்னிங்சில் சகல விக்கெட்களையும் இழந்து 303 ஓட்டங்களை பெற்றது. இதில் டேவிட் வோனர் 133 ஓட்டங்களையும், க்றிஸ் ரொஜெஸ் 38 ஓட்டங்களையும் பெற்றனர். பாகிஸ்தான் அணியின் பந்துவீச்சில் யசீர் ஷா 3 விக்கெட்களையும், ரஹாத் அலி, சுல்பிகர் பாபர் ஆகியோர் தலா 2 விக்கெட்களையும் கைப்பற்றினர். 

 

போட்டியின் நாயகனாக இரண்டு இன்னிங்சிலும் சதம் அடித்த யூனுஸ் கான் தெரிவு செய்யப்பட்டார். இந்த வெற்றியின் மூலம் 2 போட்டிகள் கொண்ட தொடரில் பாகிஸ்தான் அணி 1 இற்கு 0 என தொடரில் முன்னிலை பெற்றுள்ளது.