சாதனையுடன் வென்றது பாகிஸ்தான் அணி

அவுஸ்திரேலியா, பாகிஸ்தான் அணிகளுக்கிடையில் நடைபெற்ற இரண்டாவது டெஸ்ட் போட்டியில் பாகிஸ்தான் அணி வெற்றி பெற்று 2 போட்டிகள் அடங்கிய தொடரை 2 இற்கு 0 என வெற்றி பெற்றுக்கொண்டது. 20 வருடங்களுக்கு பின்னர் அவுஸ்திரேலியா அணியை பாகிஸ்தான் அணி டெஸ்ட் தொடர் ஒன்றில் வெற்றி பெற்றுள்ளது. இந்த வெற்றியே பாகிஸ்தான் அணி ஓட்டங்களினால் பெற்ற பெரிய வெற்றி ஆகும். அதேவேளை இந்த தொடரில் பாகிஸ்தான் அணி சார்பாக 9 சதங்கள் பெறப்பட்டன. இது புதிய சாதனையாக அமைந்துள்ளது. 2 போட்டிகள் அடங்கிய தொடரில் இதுவரை 6 சதங்கள் பெற்றதே சாதனையாக இருந்தது. இதேவேளை பாகிஸ்தான் அணித் தலைவர் மிஸ்பா உல் ஹக் இரண்டாம் இன்னிங்சில் 56 பந்துகளில் சதம் அடித்து வேகமான டெஸ்ட் சதம் என்ற சாதனையை சமப்படுத்தினார். இதற்க்கு முன்னர் மேற்கிந்திய தீவுகளின் சேர் விவியன் ரிச்சர்ட்ஸ் இந்த சாதனையை தன் வசம் வைத்து இருந்தார். இந்த தொடர் வெற்றி மூலம் ஏழாமிடத்தில் இருந்த பாகிஸ்தான் அணி 4 இடங்கள் முன்னேறி மூன்றாமிடத்திற்கு முன்னேறியுள்ளது.

 

இந்த போட்டியில் பாகிஸ்தான் அணி 356 ஓட்டங்களினால் வெற்றி பெற்றது. நாணய சுழற்சியில் வெற்றி பெற்று முதலில் துடுப்பாடிய பாகிஸ்தான் அணி 6 விக்கெட் இழப்பிற்கு 570 ஓட்டங்களைப் பெற்றது. யூனுஸ் கான் 213 ஓட்டங்களையும், மிஸ்பா உல் ஹக் 101 ஓட்டங்களையும், ஆசார் அலி 109 ஓட்டங்களையும் பெற்றனர்.மிச்சல் ஸ்டார்க் பந்துவீச்சில் 2 விக்கெட்களைக் கைப்பற்றினார். அவுஸ்திரேலியா அணி தமது முதல் இன்னிங்க்சில் சகல விக்கெட்களையும் இழந்து 261 ஓட்டங்களைப் பெற்றது. இதில் மிச்சல் மார்ஷ் 87 ஓட்டங்களையும், மைக்கல் கிளார்க் 47 ஓட்டங்களையும் பெற்றனர். பந்துவீச்சில் இம்ரான் கான் 3 விக்கெட்களையும், சுல்பிகர் பாபர், ரகாத் அலி, யசீர் ஷா ஆகியோர் தலா 2 விக்கெட்களைக் கைப்பற்றினார். பாகிஸ்தான் அணி இரண்டாம் இன்னிங்சில் 3 விக்கெட் இழப்பிற்கு 293 ஓட்டங்களைப் பெற்றது. இதில் மிஸ்பா உல் கக் ஆட்டமிழக்காமல் 101 ஓட்டங்களையும், ஆஷர் அலி ஆட்டமிழக்காமல் 100 ஓட்டங்களையும் பெற்றனர். மிச்சல் ஜோன்சன் 2 விக்கெட்களைக் கைப்பற்றினார். 603 ஓட்டங்கள் என்ற வெற்றி இலக்குடன் துடுப்பாடிய அவுஸ்திரேலியா அணி சகல விக்கெட்களையும் இழந்து 246 ஓட்டங்களைப் பெற்றுக்கொண்டது. ஸ்டீபன் ஸ்மித் 97 ஓட்டங்களையும், டேவிட் வோர்னர் 58 ஓட்டங்களையும் பெற்றனர். பந்துவீச்சில் சுல்பிகார் பாபர் 5 விக்கெட்களையும், யசீர் ஷா 3 விக்கெட்களையும், மொஹமட் ஹபீஸ் 2 விக்கெட்களையும் கைப்பற்றினார். 

 

போட்டியின் நாயகனாக மிஸ்பா உல் ஹக் தெரிவு செய்யப்பட்ட அதேவேளை தொடர் நாயகனாக யூனுஸ் கான் தெரிவு செய்யப்பட்டார்.