சம்பியன் லீக் தொடர்பில் விரைவில் பேச்சுவார்த்தை

சம்பியன் லீக் 20-20 தொடர் நிறுத்தப்படும் வாய்ப்புகள் இருப்பதாக அண்மையில் செய்திகள் வெளியாகி இருந்தன. இந்த நிலையில் இந்திய கிரிக்கெட் கட்டுப்பாட்டு சபையுடன் இணைந்து குறித்த தொடரை நடாத்திவரும் கிரிக்கெட் அவுஸ்திரேலியா மற்றும் கிரிக்கெட் தென் ஆபிரிக்கா ஆகிய அமைப்புகளுடன் பேச்சுவார்த்தை நடாத்த இருப்பதாக இந்திய கிரிக்கெட் கட்டுப்பாட்டு சபை செயலாளர் அனுராக் தாகூர் தெரிவித்துள்ளார். 

ஐ.பி.எல். தொடரின் இறுதிப் போட்டிக்கு இரண்டு சபைகளினதும் தலைவர்களும், பிரதம நிறைவேற்று அதிகாரிகளும் அழைக்கப்பட்டுள்ளனர். அந்த நேரத்தில் குறித்த தொடர் தொடர்பான பேச்சுவார்த்தை நடைபெறவுள்ளது. போதியளவு பார்வையாளர்கள் இல்லை. தொலைக்காட்சி நிறுவனத்திற்கு விளம்பரதாரர்கள் போதியளவு கிடைப்பதில்லை போன்றனவற்றுடன் பிரதான அனுசரணையாளர் தொடர் ஆரம்பித்த காலத்தில் இருந்து இன்னமும் கிடைக்கவில்லை. இந்த காரணங்களுக்காகவே இந்திய கிரிக்கெட் கட்டுப்பாட்டு சபை இந்த தொடரை நிறுத்த முனைப்புடன் இருக்கின்றது. சம்பியன் லீக் தொடர், ஐ.பி.எல் தொடர் ஆரம்பிக்கப்பட்டதன் பின்னர் இந்திய கிரிக்கெட் கட்டுப்பாட்டு சபை ஏனைய சபைகளுடன் இணைந்து ஆரம்பித்து இருந்தது.