அஷ்வினுக்கும் ஜடேஜாவுக்கும் ஓய்வு தொடர்கிறது

இந்திய, நியூசிலாந்து அணிகளுக்கிடையிலான 5 போட்டிகள் கொண்ட ஒருநாள் சர்வதேசப் போட்டித் தொடரின் இறுதி இரண்டு போட்டிகளுக்குமான குழாமில், இந்தியாவின் பிரதான சுழற்பந்து வீச்சாளர்களுக்கான இரவிச்சந்திரன் அஷ்வின், இரவீந்திர ஜடேஜா இருவருக்கும் ஓய்வு வழங்கப்பட்டுள்ளது.

டெஸ்ட் தொடரை இந்திய அணி வெல்வதற்கு முக்கிய காரணமாக அமைந்த இவர்கள் இருவருக்கும், முதல் 3 போட்டிகளிலும் ஓய்வு வழங்கப்பட்டிருந்த நிலையிலேயே, இந்த ஓய்வு தொடரவுள்ளது. வேகப்பந்து வீச்சாளர் மொஹமட் ஷமிக்கும் வழங்கப்பட்ட ஓய்வு தொடரவுள்ளது.

முதல் 3 போட்டிகளுக்குமான குழாமில் சேர்க்கப்பட்டு, காய்ச்சல் காரணமாக அப்போட்டிகளில் விளையாட முடியாது போன சுரேஷ் ரெய்னா, இக்குழாமில் சேர்க்கப்படவில்லை.

இத்தொடரில் 2-1 என்ற கணக்கில் இந்திய அணி முன்னிலை வகிப்பதோடு, அடுத்த போட்டி, நாளை இடம்பெறவுள்ளமை குறிப்பிடத்தக்கது.

குழாம்: மகேந்திரசிங் டோணி, றோகித் ஷர்மா, அஜின்கியா ரஹானே, விராத் கோலி, மனிஷ் பாண்டே, ஹார்டிக் பாண்டியா, அக்ஸர் பட்டேல், ஜயந்த் யாதவ், அமித் மிஷ்ரா, ஜஸ்பிறிட் பும்ரா, தவால் குல்கர்ணி, உமேஷ் யாதவ், மந்தீப் சிங், கேதார் யாதவ்.