ஆதிக்கம் செலுத்துகிறது இலங்கை ஏ

இலங்கைக்குக் கிரிக்கெட் சுற்றுப்பயணம் மேற்கொண்டுள்ள மேற்கிந்தியத் தீவுகள் ஏ அணிக்கும் இலங்கை ஏ அணிக்குமிடையிலான உத்தியோகபூர்வமற்ற டெஸ்ட் தொடரின் முதலாவது போட்டியின் இரண்டாம் நாள் முடிவில், இலங்கை ஏ அணி ஆதிக்கம் செலுத்தியுள்ளது.

விக்கெட் இழப்பின்றி ஓட்டமெதனையும் பெறாத நிலையில் இன்றைய இரண்டாவது நாளைத் தொடர்ந்த இலங்கை ஏ அணி, இன்றைய நாள் முடிவில் 8 விக்கெட்டுகளை இழந்து 348 ஓட்டங்களைப் பெற்றது.

முதலாவது விக்கெட்டுக்காக திமுத் கருணாரட்ணவும் குசால் பெரேராவும் 167 ஓட்டங்களைப் பகிர்ந்தனர். ஆனால், அதன் பின்னர் விக்கெட்டுகள் தொடர்ச்சியாக இழக்கப்பட்டு, 4 விக்கெட்டுகளை இழந்து 232 ஓட்டங்களுடன் தடுமாறியது. ஆனால், 5ஆவது விக்கெட்டுக்காக கருணாரட்ணவும் டிக்வெல்லவும் 85 ஓட்டங்களைப் பகிர்ந்தனர்.

மீண்டும் விக்கெட்டுகளை இழந்த இலங்கை ஏ, அடுத்த 3 விக்கெட்டுகளையும் 20 ஓட்டங்களுக்கு இழந்தது.
துடுப்பாட்டத்தில் கருணாரட்ண 132, குசால் பெரேரா 87, நிரோஷன் டிக்வெல்ல 59 ஓட்டங்களைப் பெற்றனர். எதிர்பார்ப்புடன் களமிறங்கிய லஹிரு திரிமான்ன, 2 ஓட்டங்களை மாத்திரம் பெற்றார். பந்துவீச்சில் சுழற்பந்து வீச்சாளரான றஹீம் கோர்வோல் 6 விக்கெட்டுகளைக் கைப்பற்றினார்.

இப்போட்டியில் முதலில் துடுப்பெடுத்தாடியிருந்த மேற்கிந்தியத் தீவுகள் ஏ அணி, 276 ஓட்டங்களுக்குச் சகல விக்கெட்டுகளையும் இழந்திருந்தமை குறிப்பிடத்தக்கது.