ஆஷஸ் தொடரைக் கைப்பற்றிய அவுஸ்திரேலியா

இங்கிலாந்துக்கு எதிரான ஆஷஸ் தொடரை அவுஸ்திரேலியா கைப்பற்றியுள்ளது.

ஐந்து போட்டிகள் கொண்ட இத்தொடரின் முதலிரண்டு போட்டிகளையும் ஏற்கெனவே வென்றிருந்த அவுஸ்திரேலியா, மெல்பேணில் கடந்த ஞாயிற்றுக்கிழமை ஆரம்பித்து நேற்று முடிவுக்கு வந்த மூன்றாவது போட்டியையும் வென்றமையைத் தொடர்ந்தே இரண்டு போட்டிகள் மீதமிருக்கையிலேயே தொடரைக் கைப்பற்றியுள்ளது.

நேற்றைய மூன்றாம் நாளை தமது இரண்டாவது இனிங்ஸில் நான்கு விக்கெட்டுகளை இழந்து 31 ஓட்டங்களைப் பெற்றவாறு ஆரம்பித்த இங்கிலாந்து, மிற்செல் ஸ்டார்க், ஸ்கொட் போலண்ட், கமரொன் கிறீனிடம் வரிசையாக விக்கெட்டுகளைப் பற்கொடுத்து, சகல விக்கெட்டுகளையும் இழந்து 68 ஓட்டங்களையே பெற்று இனிங்ஸ் மற்றும் 14 ஓட்டங்களால் தோல்வியடைந்தது. துடுப்பாட்டத்தில், ஜோ றூட் 28 ஓட்டங்களைப் பெற்றார். பந்துவீச்சில், போலண்ட் 6, ஸ்டார்க் 3, கிறீன் ஒரு விக்கெட்டைக் கைப்பற்றினர்.

இப்போட்டியின் நாயகனாக போலண்ட் தெரிவானார்.

ஸ்கோர் விவரம்:

நாணயச் சுழற்சி: அவுஸ்திரேலியா

இங்கிலாந்து: 185/10 (துடுப்பாட்டம்: ஜோ றூட் 50, ஜொனி பெயார்ஸ்டோ 35, பென் ஸ்டோக்ஸ் 25, ஒலி றொபின்ஸன் 22 ஓட்டங்கள். பந்துவீச்சு: பற் கமின்ஸ் 3/36, நேதன் லையன் 3/36, மிற்செல் ஸ்டார்க் 2/54, கமரொன் கிறீன் 1/7, ஸ்கொட் போலண்ட் 1/48)

அவுஸ்திரேலியா: 267/10 (துடுப்பாட்டம்: மார்க்கஸ் ஹரிஸ் 76, டேவிட் வோணர் 38, ட்ரெவிஸ் ஹெட் 27, மிற்செல் ஸ்டார்க் 24, பற் கமின்ஸ் 21 ஓட்டங்கள். பந்துவீச்சு: ஜேம்ஸ் அன்டர்சன் 4/33, ஒலி றொபின்ஸன் 2/64, மார்க் வூட் 2/71, ஜக் லீச் 1/46, பென் ஸ்டோக்ஸ் 1/47)

இங்கிலாந்து: 68/10 (துடுப்பாட்டம்: ஜோ றூட் 28 ஓட்டங்கள். பந்துவீச்சு: ஸ்கொட் போலண்ட் 6/7, மிற்செல் ஸ்டார்க் 3/29, கமரொன் கிறீன் 1/8)

போட்டியின் நாயகன்: ஸ்கொட் போலண்ட்