இத்தாலிய சீரி ஏ தொடர்: பர்மாவிடம் தோற்ற ஏ.சி மிலன்

இத்தாலிய சீரி ஏ தொடரில், தமது மைதானத்தில் ஞாயிற்றுக்கிழமை (22) நடைபெற்ற பர்மாவுடனான போட்டியில் 0-1 என்ற கோல் கணக்கில் ஏ.சி மிலன் தோல்வியடைந்தது.

பர்மா சார்பாகப் பெறப்பட்ட கோலை மரியானோ ட்ரொய்லோ பெற்றிருந்தார்.

இதேவேளை அத்லாண்டாவின் மைதானத்தில் நடைபெற்ற அவ்வணியுடனான போட்டியில் 1-2 என்ற கோல் கணக்கில் நடப்புச் சம்பியன்களான நாப்போலி தோற்றது. அத்லாண்டா சார்பாக மரியோ பஸ்காலிச், லாஸர் சமர்டிஸிச் ஆகியோர் தலா ஒவ்வொரு கோலைப் பெற்றதோடு, நாப்போலி சார்பாகப் பெறப்பட்ட கோலை சாம் பியூகெமா பெற்றிருந்தார்.

சீரி ஏ புள்ளிகள் பட்டியலில் 64 புள்ளிகளுடன் முதலாமிடத்தில் இன்டர் மிலன் காணப்படுகின்றது. 54 புள்ளிகளுடன் இரண்டாமிடத்தில் ஏ.சி மிலன் காணப்படுகின்றது. நாப்போலி, றோமா தலா 50 புள்ளிகளைப் பெற்றுள்ளபோதும் அவற்றுக்கிடையேயான போட்டி முடிவுகள் காரணமாக மூன்றாம், நான்காமிடங்களில் காணப்படுகின்றன.