எல்.பி.எல்: ஜையன்ட்ஸை வென்ற கிங்ஸ்

லங்கா பிறீமியர் லீக்கில் (எல்.பி.எல்), கொழும்பு ஆர் பிரேமதாஸ மைதானத்தில் இன்று நடைபெற்ற தம்புள்ள ஜையன்ட்ஸுக்கு எதிரான போட்டியில் ஜஃப்னா கிங்ஸ் வென்றது.

இப்போட்டியின் நாணயச் சுழற்சியில் வென்ற ஜையன்ட்ஸின் அணித்தலைவர் தசுன் ஷானக, தமதணி முதலில் துடுப்பெடுத்தாடும் என அறிவித்தார்.

அந்தவகையில், முதலில் துடுப்பெடுத்தாடிய ஜையன்ட்ஸ், ஆரம்பத்திலேயே நிரோஷன் டிக்வெல்ல, லஹிரு உதார, பில் சோல்டை சுரங்க லக்மால், மகேஷ் தீக்‌ஷனவிடம் பறிகொடுத்தது.

குறிப்பிட்ட நேரத்தின் பின்னர் ஷானக, நஜிபுல்லா ஸட்ரானை தீக்‌ஷனவின் ஒரே ஓவரில் பறிகொடுத்த ஜையன்ட்ஸ், சிறிது நேரத்தின் பின்னர் நுவனிடு பெர்ணான்டோவை ஜேடன் சியல்ஸிடம் இழந்தது.

தொடர்ந்து சாமிக கருணாரத்ன, ரமேஷ் மென்டிஸ், மேர்ச்சன்ட் டி லஞ்ச் ஆகியோரை குறிப்பிட்ட இடைவெளிகளில் வனிடு ஹஸரங்கவிடம் இழந்த ஜையன்ட்ஸ், 19.3 ஓவர்களில் சகல விக்கெட்டுகளையும் இழந்து 110 ஓட்டங்களையே பெற்றது. பந்துவீச்சில், ஹஸரங்க 4-0-16-3, தீக்‌ஷன 4-1-22-3, சியல்ஸ் 3.3-1-23-2, லக்மால் 4-0-28-2, சத்துரங்க டி சில்வா 4-0-17-0 என்ற பெறுதிகளைக் கொண்டிருந்தனர்.

பதிலுக்கு, 111 ஓட்டங்களை வெற்றியிலக்காகக் கொண்டு துடுப்பெடுத்தாடிய கிங்ஸ், ஆரம்பத்திலேயே ரஹ்மனுல்லாஹ் குர்பாஸை இம்ரான் தாஹீரிடம் இழந்தபோதும், அவிஷ்க பெர்ணான்டோவின் 33 (27), டொம் கொஹ்லர்-கட்மோரின் ஆட்டமிழக்காத 45 (30), ஷொய்ப் மலிக்கின் ஆட்டமிழக்காத 26 (10) ஓட்டங்களோடு 12.3 ஓவர்களில் 2 விக்கெட்டுகளை இழந்த நிலையில் வெற்றியிலக்கையடைந்தது. பந்துவீச்சில், தாஹீர், 4-0-20-1 என்ற பெறுதியைக் கொண்டிருந்தார்.

இப்போட்டியின் நாயகனாக தீக்ஷன தெரிவானார்.