ஐ.பி.எல்: பெங்களூரை வென்ற பஞ்சாப்

இந்தியன் பிறீமியர் லீக்கில், மும்பையில் நேற்றிரவு நடைபெற்ற றோயல் சலஞ்சர்ஸ் பெங்களூருடனான போட்டியில் பஞ்சாப் கிங்ஸ் வென்றது.

இப்போட்டியின் நாணயச் சுழற்சியில் வென்ற கிங்ஸின் அணித்தலைவர் மாயங்க் அகர்வால், தமதணி முதலில் களத்தடுப்பிலீடுபடும் என அறிவித்தார்.

அந்தவகையில், முதலில் துடுப்பெடுத்தாடிய பெங்களூர், அணித்தலைவர் பப் டு பிளெஸியின் 88 (57), விராட் கோலியின் ஆட்டமிழக்காத 41 (29), தினேஷ் கார்த்திக்கின் ஆட்டமிழக்காத 32 (14) ஓட்டங்களோடு 20 ஓவர்களில் 2 விக்கெட்டுகளை இழந்து 205 ஓட்டங்களைப் பெற்றது. பந்துவீச்சில், ராகுல் சஹர் 4-0-22-1, அர்ஷ்டீப் சிங் 4-0-31-1 என்ற பெறுதியைக் கொண்டிருந்தனர்.

பதிலுக்கு, 206 ஓட்டங்களை வெற்றியிலக்காகக் கொண்டு துடுப்பெடுத்தாடிய கிங்ஸ், பானுக ராஜபக்‌ஷவின் 43 (22), ஷீகர் தவானின் 43 (29), மாயங்க் அகர்வாலின் 32 (24), ஒடியன் ஸ்மித்தின் ஆட்டமிழக்காத 25 (08), மொஹமட் ஷாருக் கானின் ஆட்டமிழக்காத 24 (20), லியாம் லிவிங்ஸ்டோனின் 19 (10) ஓட்டங்களோடு 19 ஓவர்களில் வெற்றியிலக்கையடைந்தது.

இப்போட்டியின் நாயகனாக ஒடியன் ஸ்மித் தெரிவானார்.