சம்பியன்ஸ் லீக்: வெளியேற்றப்பட்ட யுனைட்டெட்

ஐரோப்பிய கால்பந்தாட்டச் சங்கங்களின் ஒன்றியத்தின் சம்பியன்ஸ் லீக்கிலிருந்து இங்கிலாந்து பிறீமியர் லீக் கழகமான மன்செஸ்டர் யுனைட்டெட் வெளியேற்றப்பட்டுள்ளது.

தமது மைதானத்தில் நேற்று அதிகாலை நடைபெற்ற ஜேர்மனிய புண்டெலிஸ்கா கழகமான பயேர்ண் மியூனிச்சுடனான போட்டியில் 0-1 என்ற கோல் கணக்கில் தோல்வியடைந்தமையைத் தொடர்ந்தே லீக்கிலிருந்து யுனைட்டெட் வெளியேற்றப்பட்டுள்ளது. மியூனிச் சார்பாகப் பெறப்பட்ட கோலை கிங்ஸ்லி கோமன் பெற்றிருந்தார்.

இதேவேளை, இத்தாலிய சீரி ஏ கழகமான இன்டர் மிலனின் மைதானத்தில் நடைபெற்ற அவ்வணிக்கும், ஸ்பானிய லா லிகா கழகமான றியல் சொஸைடட்டுக்குமிடையிலான போட்டி 0-0 என்ற கோல் கணக்கில் சமநிலையில் முடிவடைந்திருந்தது.

இந்நிலையில், நெதர்லாந்துக் கழகமான பி.எஸ்.வி ஐந்தோவனின் மைதானத்தில் நடைபெற்ற அவ்வணியுடனான போட்டியை இன்னொரு பிறீமியர் லீக் கழகமான ஆர்சனல் 1-1 என்ற கோல் கணக்கில் சமப்படுத்தியிருந்தது.