டு பிளெஸி சதம்: தென்னாபிரிக்கா 259/9; அவுஸ்திரேலியா 14/0

அவுஸ்திரேலிய, தென்னாபிரிக்க அணிகளுக்கிடையிலான 3 போட்டிகள் கொண்ட டெஸ்ட் தொடரின் 3ஆவதும் இறுதியுமான டெஸ்ட் போட்டி, அடிலெய்ட் ஓவல் மைதானத்தில் இன்று ஆரம்பமானது.

பகல் - இரவு டெஸ்ட் போட்டியாக இடம்பெறும் இப்போட்டியில், நாணயச் சுழற்சியில் வெற்றிபெற்ற தென்னாபிரிக்க அணி, முதலில் துடுப்பெடுத்தாடத் தீர்மானித்து, 9 விக்கெட்டுகளை இழந்து 259 ஓட்டங்களுடன் காணப்படும் போது,  இனிங்ஸை இடைநிறுத்தியது. துடுப்பாட்டத்தில் ஃபப் டு பிளெஸி ஆட்டமிழக்காமல் 118, ஸ்டீவன் குக் 40, குயின்டன் டீ கொக் 24 ஓட்டங்களைப் பெற்றனர். பந்துவீச்சில் ஜொஷ் ஹேஸல்வூட் 4 விக்கெட்டுகளையும் மிற்சல் ஸ்டார்க், ஜக்ஸன் பேர்ட் இருவரும் தலா 2 விக்கெட்டுகளையும் கைப்பற்றினர்.

12 ஓவர்கள் துடுப்பெடுத்தாட வேண்டியிருந்த நிலையில், உஸ்மான் கவாஜா, மற் றென்ஷோ இருவரும் ஆரம்பத் துடுப்பாட்ட வீரர்களாகக் களமறங்கினர், தென்னாபிரிக்க அணியின் இனிங்ஸின் இறுதிக் கட்டத்தில், வழக்கமான ஆரம்பத் துடுப்பாட்ட வீரர் டேவிட் வோணர், மைதானத்துக்கு வெளியே காணப்பட்டதால், அவர் களமிறங்க அனுமதிக்கப்படவில்லை. 12 ஓவர்களில், தங்களது விக்கெட்டை இழக்காத அவுஸ்திரேலிய ஆரம்பத் துடுப்பாட்ட வீரர்கள், 14 ஓட்டங்களைப் பெற்றனர்.