தொடரைக் கைப்பற்றிய மேற்கிந்தியத் தீவுகள்

பங்களாதேஷுக்கெதிரான ஒருநாள் சர்வதேசப் போட்டித் தொடரை மேற்கிந்தியத் தீவுகள் கைப்பற்றியது.

மூன்று போட்டிகள் கொண்ட இத்தொடரின் முதற் போட்டியை ஏற்கெனவே வென்ற மேற்கிந்தியத் தீவுகள், சென். கிட்ஸில் செவ்வாய்க்கிழமை (10) நடைபெற்ற இரண்டாவது போட்டியையும் வென்றமையையடுத்தே இன்னுமொரு போட்டி மீதமிருக்கையிலேயே தொடரைக் கைப்பற்றியது.

இப்போட்டியின் நாணயச் சுழற்சியில் வென்ற மேற்கிந்தியத் தீவுகளின் அணித்தலைவர் ஷே ஹோப், தமதணி முதலில் களத்தடுப்பிலீடுபடுமென அறிவித்தார்.

அந்தவகையில் முதலில் துடுப்பெடுத்தாடிய பங்களாதேஷ், ஜேடன் சியல்ஸ் (4), ஜஸ்டின் கிறேவ்ஸ், குடகேஷ் மோட்டி (2), மார்க்குய்னோ மின்ட்லே, றொஸ்டன் சேஸ், றொமாரியோ ஷெப்பர்ட்டிடம் விக்கெட்டுகளைப் பறிகொடுத்து 45.5 ஓவர்களில் சகல விக்கெட்டுகளையும் இழந்து 227 ஓட்டங்களைப் பெற்றது. துடுப்பாட்டத்தில், மகமதுல்லா 62 (92), தன்ஸிட் ஹஸன் 46 (33), தன்ஸிம் ஹஸன் சகிப் 45 (62) ஓட்டங்களைப் பெற்றனர்.

பதிலுக்கு 227 ஓட்டங்களை வெற்றியிலக்காகக் கொண்டு துடுப்பெடுத்தாடிய மேற்கிந்தியத் தீவுகள், பிரெண்டன் கிங்கின் 82 (76), எவின் லூயிஸின் 49 (62), கேசி கார்ட்டியின் 45 (47) ஓட்டங்களோடு 36.5 ஓவர்களில் 3 விக்கெட்டுகளை இழந்த நிலையில் வெற்றியிலக்கையடைந்தது. பந்துவீச்சில், அஃபிப் ஹொஸைன், நஹிட் ரானா, ரிஷாட் ஹொஸைன் ஆகியோர் தலா ஒவ்வொரு விக்கெட்டைக் கைப்பற்றினர்.

இப்போட்டியின் நாயகனாக சியல்ஸ் தெரிவானார்.