நியூசிலாந்துக்கெதிரான இரண்டாவது டெஸ்டில் முன்னிலையில் இலங்கை

நியூசிலாந்துக்கெதிரான இரண்டாவது டெஸ்டில் முன்னிலையில் இலங்கை காணப்படுகின்றது.

இரண்டு போட்டிகள் கொண்ட இத்தொடரின் முதலாவது போட்டியில் இலங்கை வென்ற நிலையில், காலியில் இன்று (26) ஆரம்பமான இப்போட்டியின் நாணயச் சுழற்சியில் வென்ற இலங்கையணியின் தலைவர் தனஞ்சய டி சில்வா தமதணி முதலில் துடுப்பெடுத்தாடுமென அறிவித்தார்.

அந்தவகையில் முதலில் துடுப்பெடுத்தாடக் களமிறங்கிய இலங்கை முதலாவது ஓவரிலேயே பதும் நிஸங்கவை அணித்தலைவர் டிம் செளதியிடம் இழந்தது. பின்னர் ஜோடி சேர்ந்த திமுத் கருணாரத்னவும், தினேஷ் சந்திமாலும் இனிங்ஸைக் கட்டியெழுப்பிய நிலையில் 46 ஓட்டங்களுடன் கருணாரத்ன ரண் அவுட்டானார்.

இதன் பின்னர் சந்திமாலும், அஞ்சலோ மத்தியூஸும் இனிங்ஸை நகர்த்திய நிலையில், 116 ஓட்டங்களுடன் கிளென் பிலிப்ஸிடம் சந்திமால் வீழ்ந்தார். தொடர்ந்து மத்தியூஸும், கமிந்து மென்டிஸும் ஓட்டங்களைப் பெற்ற நிலையில் முதலாம் நாள் ஆட்ட முடிவில் 3 விக்கெட்டுகளை இழந்து 306 ஓட்டங்களைப் பெற்றுள்ளது. களத்தில் மத்தியூஸ் 78 ஓட்டங்களுடனும், கமிந்து 51 ஓட்டங்களுடனும் ஆட்டமிழக்காமலுள்ளனர்.