பிறீமியர் லீக்: புல்ஹாமிடம் தோற்ற செல்சி

இங்கிலாந்து பிறீமியர் லீக்கில், புல்ஹாமின் மைதானத்தில் வியாழக்கிழமை (08) நடைபெற்ற அவ்வணியுடனான போட்டியில் 1-2 என்ற கோல் கணக்கில் செல்சி தோற்றது.

செல்சி சார்பாகப் பெறப்பட்ட கோலை லியம் டெலப் பெற்றதோடு, புல்ஹாம் சார்பாக றாவுல் ஜிமெனெஸ், ஹரி வில்சன் ஆகியோர் தலா ஒவ்வொரு கோலைப் பெற்றனர்.

இதேவேளை தமது மைதானத்தில் நடைபெற்ற பிறைட்டன் அன்ட் ஹொவ் அல்பியனுடனான போட்டியை 1-1 என்ற கோல் கணக்கில் மன்செஸ்டர் சிற்றி சமப்படுத்தியது. சிற்றி சார்பாகப் பெறப்பட்ட கோலை எர்லிங் ஹலான்ட் பெற்றதுடன், பிறைட்டன் சார்பாகப் பெறப்பட்ட கோலை கவோரு மிடோமா பெற்றிருந்தார்.

இந்நிலையில் போர்ண்மெத்தின் மைதானத்தில் நடைபெற்ற அவ்வணியுடனான போட்டியில் 2-3 என்ற கோல் கணக்கில் டொட்டென்ஹாம் ஹொட்ஸ்பர் தோற்றது.

பிறீமியர் லீக் புள்ளிகள் பட்டியலில் 48 புள்ளிகளுடன் முதலாமிடத்தில் ஆர்சனல் உள்ளது. சிற்றியும், அஸ்தன் வில்லாவும் தலா 43 புள்ளிகளைப் பெற்றுள்ளபோதும் கோலெண்ணிக்கை அடிப்படையில் இரண்டாம், மூன்றாமிடங்களில் காணப்படுகின்றன. 34 புள்ளிகளுடன் நான்காமிடத்தில் லிவர்பூல் காணப்படுகின்றது. லிவர்பூல், ஆர்சனல் ஆகியன மற்றைய அணிகளை விட ஒரு போட்டி குறைவாக விளையாடியுள்ளன.