போர்மியுலா வண்: ஹமில்டனுக்கு 100ஆவது வெற்றி

போர்மியுலா வண்ணில் 100ஆவது வெற்றியை, ரஷ்ய குரான் பிறீயில் பிரித்தானியாவின் லூயிஸ் ஹமில்டன் நேற்றுப் பெற்றுக் கொண்டார்.

இப்பந்தயத்தை முதலாமிடத்திலிருந்து ஆரம்பித்த மக்லரென் அணியின் லான்டோ நொரிஸ் மழை பெய்த இறுதிச் சுற்றுக்களில் வழுக்கும் டயர்களில் தடுமாறிய நிலையிலேயே மெர்சிடீஸ் அணியின் ஹமில்டன் பந்தயத்தை வென்றிருந்தார்.

இதேவேளை, பந்தயத்தை 20ஆம் இடத்திலிருந்து ஆரம்பித்த றெட் புல் அணியின் மக்ஸ் வெர்ஸ்டப்பன் இரண்டாமிடத்தைப் பெற்றதோடு, பெராரி அணியின் கார்லோஸ் சைன்ஸ் மூன்றாமிடத்தைப் பெற்றிருந்தார்.

இப்பந்தய முடிவில் 246.5 புள்ளிகளுடன் இவ்வாண்டுக்கான போர்மியுலா வண் சம்பியன்ஷிப் புள்ளிகள் பட்டியலில் முதலாமிடத்தில் ஹமில்டன் உள்ளார். 244.5 புள்ளிகளுடன் இரண்டாமிடத்தில் நெதர்லாந்தின் வெர்ஸ்டப்பனும், 151 புள்ளிகளுடன் மூன்றாமிடத்தில் மெர்சிடீஸ் அணியின் வல்ட்டேரி போத்தாஸும் காணப்படுகின்றனர்.