ஸஸுலோவில் இணைந்த மட்டிச்

இத்தாலிய சீரி ஏ கால்பந்தாட்டக் கழகமான ஸஸுலோவில் இங்கிலாந்து பிறீமியர் லீக் கழகமான மன்செஸ்டர் யுனைட்டெட்டின் முன்னாள் மத்தியகளவீரரான நெமஞ்சா மட்டிச் ஓராண்டு ஒப்பந்தத்தில் கைச்சாத்திட்டுள்ளதாக அக்கழகம் செவ்வாய்க்கிழமை (26) தெரிவித்துள்ளது.

பிரெஞ்சு லீக் 1 கழகமான லயோனுடனான 37 வயதான மட்டிச்சின் ஒப்பந்தமானது இரு தரப்பு இணக்கத்துடன் இரத்துச் செய்யப்பட்டிருந்தது.

இன்னொரு பிறீமியர் லீக் கழகமான செல்சியிலும் நீண்ட காலம் விளையாடியிருந்த மட்டிச், 2022-23 பருவகாலத்தில் இன்னொரு சீரி ஏ கழகமான றோமாவுக்காகவும் விளையாடியிருந்தார்.

மட்டிச்சின் ஒப்பந்தத்தில் குறிப்பிட்ட அடைவுகள் அடைந்தால் தானாகவே இரண்டாவது பருவகாலத்துக்கு ஒப்பந்தம் புதுப்பிக்கப்படுவதும் உள்ளடக்கப்பட்டுள்ளது.