மேய்ச்சல் பசுவை திருடியவர் சிக்கினார்

டி.சந்ரு 

நானுஓயா பொலிஸ் பிரிவுக்குட்பட்ட பங்களாவத்த பகுதியில் மேய்ச்சலுக்கு விடப்பட்ட பசுவை களவாடி விற்பனை செய்ய முற்பட்டவர் நானுஓயா பொலிஸாரால் கைது செய்யப்பட்டுள்ளார்.

ஹட்டன் பிரதேசத்தில்  இருந்து நுவரெலியா ஸ்கிராப் தோட்டத்திற்கு  வருகை தந்த இவர்,  மீண்டும்  இன்று (24)  காலை ஹட்டன் நோக்கி செல்லும் வழியில், பங்களாவத்த பகுதியில் வீதியோரத்தில் மேய்ச்சலுக்கு விடப்பட்ட பசுவின் கயிற்றை அறுத்து,  இழுத்துச் சென்றுள்ளார்.

இதனைக்  கண்ட ஒருவர் ஏன்? இவ்வாறு பசுவை, இழுத்துச் செல்கின்றீர்கள் என் வினவிய போது, இதனை விற்பனை செய்யப் போகிறேன் , நான் வறுமையில் இருக்கிறேன் எனவும் கூறியுள்ளார்.

  அத்துடன், 30 ஆயிரம் ரூபாய்க்கு நானுஓயாவில் விற்பனை செய்ய போவதாகவும் கூறியுள்ளார். 

இதனால் சந்தேகமடைந்த அந்த நபர், நானுஓயா பொலிஸ் நிலையத்துக்கு அறிவித்த நிலையில்,  பொலிஸாரும் சம்பவ இடத்துக்கு வருகைத் தந்து, சந்தேகநபரை  கைது செய்து விசாரணைகளை முன்னெடுத்து வருகின்றனர்.