உலகக் கிண்ண தகுதிகாண் போட்டிகள்: செக்.குடியரசை வென்றது ஜேர்மனி

இடம்பெற்றுவரும் உலகக் கிண்ண தகுதிகாண் போட்டிகளில், ஜேர்மனி, இங்கிலாந்து, போலந்து, வட அயர்லாந்து, ஸ்லோவேனியா ஆகிய அணிகள் வெற்றி பெற்றுள்ளன.

ஜேர்மனி, செக்.குடியரசு அணிகளுக்கிடையிலான போட்டியில், 3-0 என்ற கோல் கணக்கில் வெற்றி பெற்றுள்ளது. ஜேர்மனி சார்பாக, தோமஸ் முல்லர் இரண்டு கோல்களையும் டொனி க்ரூஸ்‌ ஒரு கோலினையும் பெற்றனர்.

இங்கிலாந்து, மோல்டா அணிகளுக்கிடையிலான போட்டியில், 2-0 என்ற கோல் கணக்கில் இங்கிலாந்து வென்றது. இங்கிலாந்து சார்பாக, டேனியல் ஸ்‌டரிட்ஜ், டெலே அல்லி ஆகியோர் தலா ஒவ்வொரு கோலைப் பெற்றிருந்தனர்.

போலந்து, டென்மார்க் அணிகளுக்கிடையிலான போட்டியில், 3-2 என்ற கோல் கணக்கில் போலந்து வெற்றி பெற்றிருந்தது. போலந்து சார்பாக பெறப்பட்ட மூன்று கோல்களையும் அவ்வணியின் தலைவர் ரொபேர்ட் லெவன்டோஸ்கி பெற்றிருந்தார்.

இதேவேளை, ஏனைய போட்டிகளில், வட அயர்லாந்து, 4-0 என்ற கோல் கணக்கில் சான் மரினோவை வென்றதுடன், ஸ்லோவேனியா, 1-0 என்ற கோல் கணக்கில் ஸ்லோவாக்கியாவை வென்றிருந்தது. ‌‌