ஜொலிஸ்டார்ஸ், ஸ்ரீ காமாட்சி அணிகள் வெற்றி

Kogilavani / 2014 மே 13 , மு.ப. 12:51 - 0 - {{hitsCtrl.values.hits}}

-குணசேகரன் சுரேன், நா.நவரத்தினராசா

யாழ்ப்பாணம் பிறிமியர் லீக் இருபது: 20 துடுப்பாட்டச் சுற்றுப்போட்டியில் ஜொலிஸ்டார், ஸ்ரீ காமாட்சி அணிகள் வெற்றிபெற்றன.

யுவ பிரண்ட்ஸ் பவுண்டேஷன் நிறுவனத்தின் ஏற்பாட்டில் யாழ்.மாவட்டத்தினைச் சேர்ந்த 18 துடுப்பாட்டக் கழகங்களுக்கிடையில் யாழ்ப்பாணம் பிறிமியர் லீக் (ஜே.பி.எல்) இருபது - 20 சுற்றுப்போட்டிகள் யாழ்ப்பாணம் இந்துக் கல்லூரி மைதானத்தில் சனிக்கிழமை (10) முதல் நடைபெற்று வருகின்றன.

மேற்படி சுற்றுப்போட்டியில் ஞாயிற்றுக்கிழமை (11) இரண்டு ஆட்டங்கள் இடம்பெற்றன. முதலாவது ஆட்டத்தில் ஜொலிஸடார்ஸ் அணியினை எதிர்த்து திருநெல்வேலி சி.சி அணி மோதியது.

நாணயச் சுழற்சியில் வெற்றிபெற்று முதலில் துடுப்பெடுத்தாடிய திருநெல்வேலி சி.சி அணி 20 பந்துபரிமாற்றங்களில் 7 இலக்குகளை இழந்து 131 ஓட்டங்களைப் பெற்றது. துடுப்பாட்டத்தில் எஸ்.பிரபவன் 35 ஓட்டங்களைப் பெற்றார்.

பந்துவீச்சில் ஜொலிஸ்டார்ஸ் அணி சார்பாக எஸ்.சைலேஸ்வரன் 3, எம்.மணிவண்ணன், எஸ்.மதுசன் தலா 2 இலக்குகளைக் கைப்பற்றினார்கள்.
132 ஓட்டங்கள் பெற்றால் வெற்றியென்ற இலக்குடன் பதிலுக்குத் துடுப்பெடுத்தாடக் களமிறங்கிய ஜொலிஸ்டார்ஸ் அணி 18.4 பந்துபரிமாற்றங்களில் 7 இலக்குகளை மாத்திரம் இழந்து வெற்றியிலக்கை அடைந்தது. துடுப்பாட்டத்தில் எஸ்.சஜீகன் 54 ஓட்டங்களைப் பெற்றுக்கொடுத்தார்.

பந்துவீச்சில் ஆர்.சுரேந்திரன் 3, பி.பிரபவன் 2 இலக்குகளையும் கைப்பற்றினர். போட்டியின் ஆட்டநாயகனாக 54 ஓட்டங்கள் பெற்ற எஸ்.சஜீகன் தெரிவாகினார்.

இரண்டாவது போட்டியில் ஸ்ரீ காமாட்சி அணியினை எதிர்த்து ஸ்ரான்லி அணி மோதியது, நாணயச் சுழற்சியில் வெற்றிபெற்று முதலில் துடுப்பெடுத்தாடிய ஸ்ரீ காமாட்சி அணி 20 பந்துபரிமாற்றங்களில் 7 இலக்குகளை இழந்து 176 ஓட்டங்களைப் பெற்றது. துடுப்பாட்டத்தில் எஸ்.தீபன் 59 ஓட்டங்களைப் பெற்றார்.

பந்துவீச்சில் ஸ்ரான்லி அணி சார்பாக எம்.சுதர்சன் 2 இலக்குகளைக் கைப்பற்றினார்.

177 ஓட்டங்களை வெற்றியிலக்காகக் கொண்டு பதிலுக்குத் துடுப்பெடுத்தாடக் களமிறங்கிய ஸ்ரான்லி அணி, 19.4 பந்துபரிமாற்றங்களில் 161 ஓட்டங்களுக்குச் சகல இலக்குகளையும் இழந்தது. இதனால் 15 ஓட்டங்களால் ஸ்ரீ காமாட்சி அணி வெற்றிபெற்றது. துடுப்பாட்டத்தில் எல்.இனோஜன் 38 ஓட்டங்களைப் பெற்றுக்கொடுத்தார்.

பந்துவீச்சில் ஸ்ரீ காமாட்சி அணி சார்பாக எம்.தர்ஷன் 4 இலக்குகளைக் கைப்பற்றினார். இப்போட்டியில் சிறப்பாட்டக்காரராக ஸ்ரீ காமாட்சி அணியின் எஸ்.தீபன் தெரிவு செய்யப்பட்டார்.

இச்சுற்றுப்போட்டியில் இவ்வருடம் இரண்டாவது தடவையாக நடைபெறுவதுடன், கடந்த முறை நடைபெற்ற போட்டியில் கொக்குவில் மத்திய சனசமூக நிலைய அணி வெற்றிபெற்றிருந்தது.

Comments - 0

அன்புள்ள வாசகர்களே,
நீங்கள் தெரிவிக்கும் கருத்துகளுக்கு நிர்வாகம் எவ்விதத்திலும் பொறுப்பாகாது. அவை உங்களின் தனிப்பட்ட கருத்துகளாகும். உங்களின் கருத்துகள் ஆசிரியரின் தகுந்த தணிக்கைக்குப் பிறகே பதிவேற்றம் செய்யப்படும் என்பதைக் கவனத்திற்கொள்க. உங்கள் யோசனைகளையும் எங்களுக்கு அனுப்புங்கள். .