சிறுவர் துஷ்பிரயோகங்களுக்கு எதிராக ஆர்ப்பாட்டம்

எஸ்.சதீஸ்

பொகவந்தலாவை, கெம்பியன் நகரில்  சிறுவர் துஷ்பிரயோகங்களை கண்டித்தும் மக்களுக்கு தெளிவூட்டும் வகையிலும் ஆர்பாட்டம் ஒன்று  இன்று (05) முன்னெடுக்கப்பட்டது.

இதில் 150க்கும் மேற்பட்ட சிறுவர்கள் கலந்துக்கொண்டு பொகவந்தலாவை கெம்பியன் தோட்ட வைத்தியசாலையில் இருந்து கெம்பியன் நகர்வரை பாதாதைகளை ஏந்தியவாறு ஊர்வலமாக சென்றனர்.

இதன்போது, 'மலையகத்தில் சிறுவர்கள் வேலைக்கு அமர்த்தப்படக் கூடாது, சிறுவர் மீது துஷ்பிரயோகங்களை மேற்கொள்வோருக்கு எதிராக தண்டனை வழங்க வேண்டும்' என ஆர்ப்பாட்டத்தில் ஈடுபட்ட சிறுவர்கள் கோஷம் எழுப்பினர்.

இதேவேளை, நாடாளுமன்றத்தில்  அரசியல் வாதிகள் மௌனம் காக்காமல் சிறுவர் துஷ்பிரயோகத்திற்கு எதிராக கடுமையான சட்டங்களை கொண்டுவர  அழுத்தம் கொடுக்க வேண்டுமென ஆர்ப்பாட்டத்தில் ஈடுபட்டவர்கள் தெரிவித்தனர்.

கெம்பியன் தோட்ட வைத்தியசாலையில்  சிறுவர்கள் எதிர் நோக்கும் துஷ்பிரயோகங்கள் குறித்து  தெளிவூட்டும் செயலமர்வு ஒன்று பொகவந்தலாவை  பொலிஸாரால் ஏற்பாடு செய்யப்பட்டிருந்தது.