அரசியல் பொழுதுபோக்கு அல்ல

பதவிக்காகக் கைகோர்ப்பார்கள்; பின்னர் பதவிகளைக் கைப்பற்ற முடியாது விட்டால், பதவிகளைப் பெற்றவர்களுடன் நாடாளுமன்றத்தில் கைகலப்பில் ஈடுபடுவார்கள்.

இந்த அரிய காட்சிகளைத் தொலைக்காட்சியூடாகப் பார்க்கும் மக்கள் தலையில் கைவைப்பார்கள்; ஆனாலும் இரசிப்பார்கள். 

இதில் வேடிக்கை என்னவெனில், இவர்கள் எல்லாம் ஒழுக்கம் பற்றியெல்லாம் மக்களுக்குப் பாடம் கற்பிப்பார்கள். இந்தப் போலி அரசியலை, அரசியல்வாதிகளை மக்கள் அடிக்கடி உருவாக்கி ஏமாந்து போய்விடுவார்கள்.

இன்னமும் அரசியலில் விழிப்புநிலை உருவாகவில்லை. ஒழுக்கம் சார்ந்த அரசியல் மனப்பாங்கு இல்லாதவரை எந்த நாடும் உருப்படப் போவதில்லை. 

பிரச்சினைகளைத் தீர்க்கும் துணிச்சல் இல்லாதவர்களைப் பொதுமக்கள் தூக்கி எறிய வேண்டும். அரசியல் பொழுதுபோக்கு அல்ல; மக்கள் வாழ்வின் ஆதாரம்.

முன்னேற்றம், நல்ல அரசியலால்த்தான் உருவாகும். 

வாழ்வியல் தரிசனம் 28/03/2017

- பருத்தியூர் பால. வயிரவநாதன்